Дар Муассисаи давлатии вилоятии Театри мусиқӣ-драммавии ба номи М. Воҳидови ноҳияи Ашт раиси ноҳия бо наврасону ҷавонон, варзишгарон ва дигар қишрҳои ҷомеа мулоқот доир намуда, мавзӯи “Экстремизм ва терроризмро маҳкум менамоем”-ро баррасӣ намуданд.

Раиси ноҳия Зариф Мирдадо дар назди ҳозирин бо маърӯзаи муфассал оид ба пешгирии гаравидани ҷавонон ба ҳизбу ҳаракатҳои номатлуб, ҳадафҳои ғаразноки ТЭТ ҲНИ ва роҳҳои пешгирии ин ҳаводиси нохушоянд баромад кард.

Қайд карда шуд, ки Тоҷикистон ҷиҳати муборизаи пайваставу самарабахш алайҳи вабои аср—терроризм ва экстремизм шарики боэътимоди кулли кишварҳои мубориз аст. Давлати ҷавон, вале таҷрибадори тоҷикон барои амалӣ шудани ҳадафҳо дар самти аз байн бурдани ин вабои аср иқдомҳои муҳиму саривақтиро роҳандозӣ намудааст.

Воқеан вазъи ҷаҳони имрӯз ҷиҳати паёмадҳои амалҳои террористӣ нигаронкунанда аст ва аз ҳар нафар зиракии сиёсӣ, гиромӣ доштани арзишҳои фарҳангиву миллӣ, донистану дарк намудани ҳадафҳои ғаразноки ин қувваҳои муташаккилу хатарнокро талаб мекунад. Имрӯз тоҷикон ва тоҷикистониён нисбати чанд соли пеш мазмуну муҳтавои нақшаҳои хиёнаткоронаи ТЭТ ҲНИ ва дигар гурӯҳҳои ифротгароро хубтар дарк кардаанд.

Амалиёти мусаллаҳонаи генерали хоин Абдуҳалим Назарзода, ҳамлаи ноҷавонмардона ба сайёҳони хориҷӣ, амалиёти хоинонаву хиёнаткоронаи чанде аз нохалафон вақти ҳамла ба дидбонгоҳи сарҳадии “Ишқобод” дар арафаи таҷлили 25-солагии Конститутсияи кишвар ва боз чандин амалҳои онҳо бори дигар нақшаҳои ғаразнок, аммо амалинашавандаи онҳоро бозгӯ намуд.

Мавриди зикр аст, ки имрӯз дар ноҳия 84 нафар дар кофтукови ҷиноятӣ қарор доранд ва 1 нафар ба Ватан баргардонида шудааст, ки ин ҳар нафарро, чи хурду чи бузург ҳушдор медиҳад, то бетарафу бемасъулият набошем. Ҳамдарди ҷомеа, наздику қарини пайвандон, пурсандаи ҳолу аҳволи фарзандон, огоҳ аз дӯстон бошем.

Шодмон НУРМАТОВ ,"ҶТ"