11 март дар Филармонияи давлатии Тоҷикистон ба номи Акашариф Ҷӯраев маросими бошукӯҳи таҷлили Рӯзи матбуоти тоҷик доир гардид.

Дар ин чорабинии бошукӯҳ Матлубахон Сатториён, вазири фарҳанги Ҷумҳурии Точикистон, Масрур Абдуллозода, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Маликшо Неъматзода, муовини аввали Раиси Ҳизби Халқии Демократии Тоҷикистон, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ҳамчунин намояндагони ВАО-и мамлакат иштирок доштанд.

Чорабинӣ бо садо додани Суруди миллӣ оғоз гардида, дар идома навори кӯтоҳ аз пайдоиши аввалин рӯзномаи тоҷик “Бухорои Шариф” ва нақши матбуоти даврӣ аз замони ба фаъолият шуруъ намудан то ин давра, ки давраи пешрафт ва рушди технологияҳо аст, бо фарогири маълумотҳои зарурӣ манзури тамошобинон шуд.

Гуфта шуд, ки 11 марти соли 1912 нахустин шумораи рӯзномаи тоҷикӣ “Бухорои шариф” аз чоп баромадаву дастраси хонандагон гардида буд ва ба ин хотир Рӯзи матбуоти тоҷик ба ин сана тааллуқ дорад. Ин сана аз соли 1994 инҷониб дар саросари Тоҷикистон расман ҷашн гирифта мешавад.

Матлубахон Сатториён зимни баромади хеш иброз намуд, ки матбуоти даврӣ дар ҳама марҳилаҳои давлатдорӣ дар баланд бардоштани сатҳи маърифати шаҳрвандон, таҳкими Ваҳдати миллӣ ва устувории Истиқлоли давлатӣ нақши калидиро бозидаву саҳми назаррас дорад ва ин аст, ки заҳмати аҳли қалам аз ҷониби Ҳукумати кишвар ҳамеша қадрдонӣ мешавад.

Баъдан Масрур Абдуллозода, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа аз номи Дастгоҳи иҷроияи Президенти Ҷумҳурии Тоҷикистон аҳли қаламро табрик гуфта ба ҳамаи онҳо таманнои сиҳату саломатӣ ва пешрафт дар кору пайкорашонро орзу намуд.

Дар идомаи чорабинӣ гуфта шуд, ки замони муосир, ки давраи пешрафти техникаву технология аст ва садҳо иттилооти нодуруст дар ҷомеа паҳн мешавад, танҳо матбуоти расми метавонад, маълумоти дуруст ва беғаразонаро ба оммо расонад ва бо ин роҳ дар таъмини амнияти иттилотӣ саҳми арзанда гузорад.

Ҳамчунин, таъкид шуд, кормандони матбуотро лозим аст, ки бо масъулияти баланд пайи иҷрои вазифаҳои худ шуда, содиқона ба ватан ва ҷомеа хизмат намуда, дар ҳифзи арзишҳои миллӣ ва Истиқлоли давлатӣ саҳми босазо гузоранд.

Дар рафти чорабинӣ як қатор рӯзноманигорон бо нишони сарисинагии “Аълочии матбуоти Ҷумҳурии Тоҷикистон” қадрдонӣ шуданд. Инчунин, чанде аз рӯзноманигорон барои саҳми арзанда дар татбиқи ҳадафҳои созанда ва бунёдкоронаи Ҳизби Халқии Демократии Тоҷикистон, баланд бардоштани мақоми он дар ҷомеа, тақвияти ҳисси худогоҳиву хештаншиносӣ ва ҳуввияти миллӣ бо сипосномаҳои Ҳизби Халқии Демократии Тоҷикистон сарфароз шуданд.

Ҳамзамон, дар чорабинӣ аз ҷониби Вазорати фарҳанги Ҷумҳурии Тоҷикистон барои фаъолияти пурсамар ба шумораи зиёди нашрияҳои ҷумҳурӣ сипосномаҳо тақдим шуд.

Дар ҷараёни чорабинии тантанавӣ бахшида ба муносибати Рӯзи матбуоти тоҷик ҳамчунин як қатор рӯзноманигорон бо ҷоизаҳои Иттифоқи журналистони Тоҷикистон қадрдонӣ шуданд.

Ҷоизаи Иттифоқи журналистони Тоҷикистон ба номи А. Лоҳутӣ дар бахши матбуот:

Робия Холмирзоева, сармуҳаррири рӯзномаи “Анбоз”, Искандар Маҳмадалиев, узви ИЖТ, Ҷумахон Файзализода, узви ИЖТ, Мухтор Абдуллоев, хабарнигори нашрияи “Ҳақиқати Суғд”, Амрулло Забиров, рӯзноманигори мустақил аз шаҳри Ваҳдат, Луқмонҷон Қурбонов, сармуҳаррири нашрияи “Зарафшон”-и шаҳри Панҷакент ва Алишери Абдумаҷид, хабарнигори нашрияи Хатлон дар минтақаи Кӯлоб.

Инчунин, ҷоизаи Воҳид Асрорӣ барои донишҷӯён ба тариқи зайл муайян шуданд:

Руҳавзо Муродова, донишҷӯи Донишгоҳи иллии Тоҷикистон;

Олимҷон Раҳмонзода, донишҷӯи Донишгоҳи иллии Тоҷикистон;

Мунавваршо Разоқов, донишҷӯи Донишгоҳи давлатии Бохтар ба номи Носири Хусрав;

Гулбаҳор Элчибекова, донишҷӯи Донишкадаи давлатии фарҳанг ва санъати Тоҷикистон ба номи Мирзо Турсунзода;

Шаҳзода Абдуҷабборзода, донишҷӯи Донишгоҳи байналмилалии забонҳои хориҷии Тоҷикистон ба номи Сотим Улуғзода;

Ҳамчунин дар идома ҷоизаи ба номи устод Асадулло Саъдуллоев ба нашрияҳои беҳтарини маҳаллӣ дар соли 2025 супорида шуд, ки инҳоянд:

Нашрияи “Тахти Қубод” ва нашрияи “Паёми Истаравшан”;

Дар фарҷоми чорабинии тантанавӣ аз ҷониби сарояндагон барномаи фарҳангӣ пешкаши ҳозирин гардонида шуд.

Гулафшон КАРИМОВА, “ҶТ”