Дар шашмоҳаи аввали соли 2026 аз ҷониби Агентии ҳифзи мероси таърихию фарҳангии назди Ҳукумати Ҷумҳурии Тоҷикистон Феҳристи давлатии ёдгориҳои таърихию фарҳангии Ҷумҳурии Тоҷикистон дар таҳрири нав таҳия шуда, зиёда аз 3500 адад ёдгориҳои таърихию фарҳангӣ ва монументалӣ ба қайд гирифта шуд.

Дар ин хусус Шералӣ Хоҷазода, директори Агентии мазкур зимни нишасти хабарӣ ба рӯзноманигорон иттилоъ дод.

Ӯ зикр намуд, ки ин теъдод нисбат ба бақайдгирии соли 2018 120 адад зиёд мебошад.

Гуфта шуд, ки ҳангоми пешбурди корҳои азнавбақайдгирии ёдгориҳои таърихию фарҳангӣ кормандони Агентӣ дар ҳудуди шаҳру ноҳияҳои Душанбе, Бохтар, Норак, Ҳисор, Турсунзода, Истаравшан, Панҷакент, Ваҳдат Муъминобод, Шамсиддини Шоҳин, Ховалинг, Ҳамадонӣ, Темурмалик, Ашт, Кӯҳистони Мастчоҳ, Айнӣ, Шуғнон, Сангвор, Рашт, Лахш ва Нуробод зиёда аз 120 ёдгории бостонӣ ва монументалиро кашф намуданд, ки тибқи муқаррарот, ба қайди давлатӣ гирифта мешаванд.

Дар идома таъкид гардид, ки дар ҳудуди ёдгории бостонии Золи Зари Фархор сохтмони бинои “Ташхисгоҳи бостоншиносӣ ва осорхона”-и Фархор оғоз гардида, дар арафаи ҷашни 35-солагии Истиқлоли кишвар ба истифода дода мешавад.

Инчунин, дар ин давра аз ҷониби Агентӣ лоиҳаи “Барномаи давлатии ҳифзи мероси таърихию фарҳангӣ барои солҳои 2027-2031” таҳия гардида, айни замон дар мувофиқаи мақомоти дахлдор қарор дорад.