Дар шаҳри Хуҷанд Форуми сеюми байналмилалии сайёҳӣ таҳти унвони “Суғд - чорроҳаи роҳи бузурги Абрешим” баргузор гардид. Ин ҳамоиши муҳим, ки метавонад дар рушди соҳаи сайёҳӣ такони ҷиддӣ бахшад, бо ташаббуси Мақомоти иҷроияи ҳокимияти давлатии вилояти Суғд ташкил гардид. Дар ин форум беш аз 500 намояндаи соҳаи сайёҳӣ аз 9 кишвари ҷаҳон, намоянадагони минтақаҳои гуногуни Тоҷикистон иштирок доранд.

Раҷаб Аҳмадзода, раиси вилояти Суғд ба кори Форум оғоз бахшида, вобаста ба таърихи пурифтихори миллати куҳанбунёди тоҷик, фарҳанги бой, тамаддуни оламгир ва зарфиятҳои соҳаҳои муҳими иқтисоди миллӣ, аз ҷумла соҳаи сайёҳӣ маълумот дод.

Гуфта шуд, ки Тоҷикистон аз рӯзҳои аввали соҳибистиқлолӣ дар асоси принсипи сиёсати дарҳои боз бо кишварҳои олам робитаи дӯстонаро ба роҳ монда, имрӯз ҳамкориҳои мутақобилан судманд ба рушди соҳаҳои мухталиф, аз ҷумла сайёҳӣ замина гузоштааст.

Гуфта шуд, ки манзараҳои нотакрори Тоҷикистон, обҳои мусаффо, кӯҳҳои сар ба афлок, сабзавоту меваҷоти аз лиҳози экологӣ тоза, меҳмоннавозии тоҷикона, таъомҳои лазизи миллӣ ва муҳимтар аз ҳама пойдории сулҳу субот боиси ҷалби бештари таваҷҷуҳи сайёҳону меҳмонон гардидааст. Дар асоси дастуру супоришҳои Пешвои миллат муҳтарам Эмомалӣ Раҳмон дар вилояти Суғд ба рушди соҳаи сайёҳӣ ҳамчун соҳаи афзалиятнок таваҷҷуҳи хоса равона шудааст. Бунёди инфарсохтори муҳими соҳа, ба монанди меҳмонхонаву тарабхона, ососишгоҳҳои замонавӣ, эҳёи макону мавзеъҳои таърихиву фарҳангӣ, рушди ҳунарҳои мардумӣ аз ҷумлаи тадбирҳои андешидашуда дар ин самт маънидод карда шуд.

Дар идомаи кори Форум муовини раиси Кумитаи рушди сайёҳии назди Ҳукумати Ҷумҳурии Тоҷикистон, муовини раиси вилояти Хатлон ва дигар иштирокчиёни ин ҳамоиши муҳими байналмилалӣ вобаста ба нақши соҳаи сайёҳӣ дар рушди иқтисод, муаррифии зарфиятҳои соҳаҳои мухлалиф, мустаҳкам гардидани муносиботи дӯстӣ миёни кишварҳо ва дарёфти роҳҳои нави рушди соҳаи сайёҳӣ андешаҳои худро баён доштанд.

Интизор меравад, ки дар доираи ин форум роҳҳои нави ҳамкорӣ, ҷалби сармоя ва рушди инфрасохтори сайёҳӣ баррасӣ гардад.

Субҳиддин ҚОДИРОВ, “ҶТ”