Имрӯз дар меҳмонхонаи “Hilton”-и пойтахт Форуми байналмилалии “Дурнамои ҳамкории фаромарзӣ. Навоварӣ ва амалҳо дар соҳаи захираҳои обӣ барои рушди устувор” оғоз гардид.

Дар он Шоимзода Ҷамшед, муовини якуми вазири энергетика ва захираҳои оби Ҷумҳурии Тоҷикистон, Ҳамраев Шавкат, вазири хоҷагии оби Ҷумҳурии Узбекистон, Нуржан Нурҷигитов, вазири захираҳои об ва ирригатсияи Ҷумҳурии Қазоқистон, Абдибай Ҷайлообаев, муовини директори Хадамоти захираҳои оби назди Вазорати захираҳои об, кишоварзӣ ва саноати коркарди Ҷумҳурии Қирғизистон ва ҳамчунин коршиносони соҳа иштирок доранд.

Ин чорабинӣ аз ҷониби Гурӯҳи Бонки ҷаҳонӣ, Барномаи обу энергетика барои Осиёи Марказӣ (CAWEP) ва Институти байналмилалии идоракунии захираҳои об (IWMI) дар Душанбе баргузор гардида истодааст.

Ба гуфтаи масъулин Форум дар доираи Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор” барои солҳои 2018–2028, ки аз 25 то 28 майи соли 2026 дар Душанбе доир мешавад, баргузор шудааст.

Дар форум намояндагони кишварҳо доир ба масъалаҳои муҳимтарини муштараки вобаста ба об дар минтақа, аз ҷумла мутобиқшавӣ ба тағйирёбии иқлим, навовариҳои рақамӣ, ҳамкории институтсионалӣ ва ҳамоҳангсозии идоракунии ҳавзаҳои обиро дар баромадҳои худ баррасӣ доранд.

Таъкид шуд, ки об яке аз омилҳои муҳими рушди устувор ба шумор рафта, истифодаи самараноки он метавонад ба беҳтар гардидани сатҳи зиндагии аҳолӣ ва рушди иқтисоди кишварҳо мусоидат намояд.

Интизор меравад, ки иштирокчиёни форум изҳороти муштарак таҳия намоянд, ки он дар Конфронси чоруми Даҳсолаи амал оид ба захираҳои обӣ дар Душанбе, инчунин дар Форуми 11-уми ҷаҳонии об, ки соли 2027 дар шаҳри Ар-Риёз баргузор мегардад, пешниҳод карда шавад.

Г. КАРИМОВА, “ҶТ”