Аз 15 то 24 июни соли 2026 дар мувофиқа бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ва бо пешниҳоди Котиботи Ассамблеяи Байнипарламентии давлатҳои иштирокчии Иттиҳоди Давлатҳои Мустақил Форуми XI–уми байналмилалии фарҳангию маърифатии “Кӯдакони Иттиҳод” баргузор мегардад.

Дар ин бора аз дафтари матбуоти Маҷлиси миллӣ хабар доданд. Ба иттилои манбаъ ин форум бори нахуст дар Ҷумҳурии Тоҷикистон баргузор гардида, дар он намояндагони ҷумҳуриҳои Озарбойҷон, Арманистон, Беларус, Қазоқистон, Қирғизистон, Ӯзбекистон, Федератсияи Россия ва Туркманистон иштирок менамоянд.

Форуми мазкур дар истироҳатгоҳи кӯдаконаи “Шоҳин” воқеъ дар шаҳри Гулистони вилояти Суғд баргузор гардида, дар доираи он беш аз сӣ чорабинӣ ба нақша гирифта шудааст.

Дар ҷараёни Форум кӯдакон бо таъриху фарҳанг ва анъанаҳои миллии кишварҳои иштирокчӣ шинос шуда, дар олимпиадаи зеҳнӣ, вохӯрӣ бо қаҳрамонҳои варзиш, мастер-классҳо, гаштҳои сайёҳӣ, марафони тарбияи ҷисмонӣ ва варзишӣ ва дигар мусобиқаҳои дӯстона ширкат меварзанд.

Форум 23 июн дар шаҳри Душанбе идома ёфта, кӯдакон аз як қатор муассисаҳои фарҳангии пойтахт ва Парламенти Ҷумҳурии Тоҷикистон боздид ба амал меоранд.

Ҳадафи баргузории Форум муколамаи фарҳангӣ ва тақвияти робитаҳои дӯстона байни намояндагони насли ҷавони кишварҳои Иттиҳод арзёбӣ мегардад.

Қобили зикр аст, ки Форуми байналмилалии фарҳангию маърифатии “Кӯдакони Иттиҳод” шуруъ аз соли 2013 дар Ҷумҳурии Қирғизистон, Федератсияи Россия, Ҷумҳурии Ӯзбекистон ва Ҷумҳурии Беларус баргузор шуда буд.