Бо мақсади иҷрои дастуру супоришҳои Пешвои миллат муҳтарам Эмомалӣ Раҳмон ҷиҳати бунёди майдончаҳои варзишӣ дар деҳаҳое, ки зиёда аз сад хоҷагӣ доранд, инчунин истиқболи 34 - солагии Истиқлоли давлатӣ, 28 август дар деҳаи Емси Ҷамоати деҳоти Бартанги ноҳияи Рӯшон майдончаи варзишӣ мавриди баҳрабардорӣ қарор гирифт.

Иншооти мазкур бо дастгирии мақомоти иҷроияи ҳокимияти давлатии ноҳия дар ҳамдастӣ бо соҳибкорон ва ҷавонони деҳа бунёд гардида, дорои тамоми шароити муосири баргузории мусобиқаҳои варзишӣ мебошад.

Раиси ВМКБ Мирзонабот Алишер Худобердӣ дар ифтитоҳи майдонча барои ҳарчи бештар ҷалб намудани ҷавонон ба варзиш ва интихоби тарзи ҳаёти солим ба масъулин дастур дода, иншоотро туҳфаи арзанда ба ҷашни Истиқлол маънидод кард.

Ҷавонони деҳа аз дастгириҳои ҳамешагии Ҳукумати мамлакат ва мақомоти иҷроияи ҳокимияти давлатӣ изҳори хушнудӣ намуда, миннатдориашонро баён намуданд.

Дар ҷараёни кушодашавии майдончаи мазкур ҳамчунин аз номи раиси ВМКБ ба наврасони деҳа тӯб ва лавозимоти варзишӣ тақдим гардид.

Садоншо ҶАНОБИЛШОЕВ, "ҶТ"