Дар Фурудгоҳи байналмилалии Душанбе онҳоро ҳаводорони варзиш пешвоз гирифтанд

Шоми 5-уми октябр ҷоизадорони дигари варзиши кишвар аз 19-умин Бозиҳои осиёии Ҳангжоу - Хайрандеш Муродзода ва Ҳақназар Назаров ба Ватан баргаштанд.

Варзишгарони муваффақи кишварро Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилшод Назаров, ноиби Президенти Кумитаи миллии олимпии Тоҷикистон, роҳбарияти Федератсияи гӯштингирии Тоҷикистон, намояндагони ВАО ва шумораи зиёди ҳаводорону мухлисони гӯштини кураш бо самимияти хосса пешвоз гирифтанд.

Ин ду варзишгари бомаҳорати кишвар дар рӯзи ҳафтум ва нуҳуми мусобиқоти мазкур аз худ маҳорати баланди варзишӣ нишон дода, ҳарду ба гирифтани медали биринҷӣ аз намуди гӯштини кураш даст ёфтанд.

Зимни истиқболи варзишгарон Абдулло Раҳмонзода, раиси КҶВ суханронӣ намуда, сараввал ин ду ҷоизадори Бозиҳои осиёиро бо натиҷаи бадастовардаашон самимона табрик гуфт. Раиси Кумита иброз дошт, ки ин ҳама дастоварду шуҳратҳои ба варзиши Тоҷикистон замгардида, маҳз маҳсули талошу заҳматҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва фазои орому осудаи кишвар мебошад.

“Маҳз ҳамин таваҷҷуҳҳо буд, ки варзиши кишвар торафт рушд ёфта, ба дастовардҳои таърихӣ ноил гардида истодааст. Имрӯз варзишгарони моро дар арсаи ҷаҳонӣ мешиносанд ва ба ҳунарнамоии онҳо дар сабқатҳои байналмилалӣ истиқбол менамоянд”, - гуфт А. Раҳмонзода.

Варзишгарон низ аз дастгириҳои пайвастаи давлату ҳукумат изҳори миннатдорӣ намуданд.

- Сараввал сипоси бепоёни худро ба кулли ҳамватанон мерасонам. Зеро маҳз дастгириҳои онҳо буд, ки мо то ба ин мартаба расидем. Дар идома ҳамчунин миннатдории хешро ба Президенти кишвар ва раиси шаҳри Душанбе низ мерасонам. Зеро таваҷҷуҳи бевоситаи онҳо буд, ки мо-варзишгарон руҳбаланд шудем ва дар ин сабқатҳо кӯшиш намудем, то Парчами ватани худро баланд бардорем, - гуфт Хайрандеш Муродзода, дорандаи медали биринҷии БО.

Бояд гуфт, ба варзишгароне, ки дар Бозиҳои Осиёи Ҳангжоу нишони тилло мегиранд, 150 000 сомонӣ, барандагони нишони нуқра 100 000 сомонӣ ва соҳибони нишони биринҷӣ 50 000 сомонӣ Ҷоизаи Президенти Ҷумҳурии Тоҷикистон дода мешавад. Ҳамчунин бо қарори вижаи раиси шаҳри Душанбе Рустами Эмомалӣ ба гирандагони медали тилло хонаи 3 - ҳуҷрадор, медали нуқра 2 - ҳуҷрадор ва медали биринҷӣ хонаи 1 - ҳуҷрадор тақдим мегардад.

Бозиҳои 19-уми тобистонаи осиёӣ аз 23-уми сентябр оғоз шуда, он то 8-уми октябр идома мекунад. Айни замон дар корномаи варзишгарони мо аз сабқати мазкур 7 медал сабт гардидааст, ки аз ин ду тилло – Сомон Маҳмадбеков (ҷудо), Давлат Болтаев (бокс), як нуқра – Темур Раҳимов (ҷудо) ва чор биринҷӣ – Беҳрӯз Хоҷазода (ҷудо), Хайрандеш Муродзода, Ҳақназар Назаров (кураш) ва Миҷгона Самадова (бокс) мебошад.

Ҳошим РАҲМАТУЛЛОЕВ “ҶТ”