Паҳлавонони Тоҷикистон дар мусобиқаи кураш дар Бозиҳои XX Осиёӣ-2026 дар Айи ва Нагояи Ҷопон натиҷаи назаррас нишон медиҳанд.

Дар вазни то 66 килограмм Сарвар Абдушукуров бо баромади муваффақона ба марҳилаи нимниҳоӣ расид ва дар натиҷаи рақобатҳои ин марҳила соҳиби медали биринҷии Бозиҳои Осиёӣ гардид.

Ҳамзамон, Ёсин Бобокалонов дар ҳамин вазн рақобатҳои худро бо пирӯзиҳои боварибахш идома дода, ба финали мусобиқа роҳ ёфт. Баъд аз финал соҳиби медали нуқра гардид. Ӯ дар даври 1/8-финалӣ бар Ватанабе Исами аз Ҷопон бо ҳисоби 10:0 пирӯз шуда, дар чорякфинал Ҳидир Муҳаммадовро низ бо ҳисоби 5:0 мағлуб кард. Ин натиҷаҳо роҳашро ба марҳилаи нимниҳоӣ боз карданд.

Ёсин Бобокалонов аз чеҳраҳои шинохтаи кураши тоҷик ба шумор меравад. Ӯ моҳи июни соли ҷорӣ дар Чемпионати Осиё оид ба кураш, ки дар Душанбе баргузор шуд, дар вазни то 66 килограмм медали тилло ба даст оварда буд.

Сарвар Абдушукуров низ таҷрибаи хуби байналмилалӣ дорад. Ӯ соли 2025 дар Чемпионати Осиё оид ба кураш дар вазни то 66 килограмм ба гирифтани медали тилло мушарраф шуда буд.

Ҳамин тариқ, Тоҷикистон дар мусобиқаи кураши Бозиҳои Осиёӣ-2026 соҳиби ду медали биринҷӣ ва як нуқра гардид.

Бояд гуфт, ки дар ҳайати Тоҷикистон дар мусобиқаи кураш Шоҳида Қаландарова, Сарвар Абдушукуров, Ёсин Бобокалонов ва Шакармамад Мирмамадов иштирок доранд.

Яҳё МАҲМАДНАБИЕВ, “ҶТ”