23 июн дар доираи сафари кории Билол Эрдуғон, раиси Конфедератсияи ҷаҳонии этно-варзиш ва Абдуллоҳ Эрен, президенти Агентии ҳамкорӣ ва ҳамоҳангсозии Туркия (ТИКА) ба Ҷумҳурии Тоҷикистон маросими ифтитоҳи лоиҳаи таъмир ва муҷаҳҳазгардонии толори гӯштини миллӣ дар Донишкадаи тарбияи ҷисмонии Тоҷикистон ба номи С. Раҳимов баргузор гардид.

Маросим бо иштироки Раҳимзода Шабнам, муовини якуми раиси Кумитаи кор бо ҷавонон ва варзиш, Амир Иброҳимзода, ректори Донишкадаи тарбияи ҷисмонии Тоҷикистон ба номи С. Раҳимов, Муҳаммадшоҳ Абдуллозода, котиби генералии Кумитаи миллии олимпии Тоҷикистон меҳмонон ва дигар намояндагони мақомотҳои дахлдор доир шуд.

Иншооти варзишии болозикр барои рушди минбаъдаи соҳаи варзиш, ҷалби ҳарчи бештари ҷавонон ба тарзи ҳаёти солим ва рушди намудҳои варзиши миллӣ заминаи мусоид фароҳам хоҳад овард. Инчунин, маврид ба зикр аст, ки толори варзишии мазкур бо таҷҳизоти муосири варзишӣ таъмин гардида, ба баргузор намудани машқҳо ва омодасозии варзишгарон барои иштирок дар мусобиқаҳои дохилӣ ва байналмилалӣ мусоидат менамояд.

Зимни сӯҳбат, ҷонибҳо масъалаҳои густариши ҳамкориҳорои дуҷониба дар соҳаи рушди тарбияи ҷисмонӣ ва варзиш ва татбиқи лоиҳаҳои муштарак дар доираи ҳамкориҳои ба роҳ мондашударо мавриди баррасӣ қарор доданд.

Таъкид гардид, ки муносибатҳои дӯстона ва ҳамкориҳои мутақобилан судманди Ҷумҳурии Тоҷикистон ва Ҷумҳурии Туркия сол аз сол таҳким ёфта, татбиқи чунин ташаббусҳо барои рушди соҳаи варзиш ва ҷавонон, инчунин, муаррифии арзишҳои миллӣ ва фарҳангии халқҳо мусоидат менамояд.