Донишҷӯёни Донишкадаи тарбияи ҷисмонии Тоҷикистон ба номи С. Раҳимов дар нимсолаи якуми соли 2026 дар мусобиқаҳои байналмилалӣ ҳунарнамоии назаррас нишон дода, соҳиби 71 медал гардиданд.

Дар ин бора имрӯз – 3 август Амир Иброҳимзода, ректори Донишкада зимни нишасти матбуотӣ иттилоъ дод.

Ба гуфтаи ӯ, дар давраи ҳисоботӣ 72 нафар донишҷӯи Донишкада дар 15 мусобиқаи байналмилалӣ, ки дар 27 кишвари ҷаҳон баргузор шуданд, иштирок намуда, 37 медали тилло, 18 медали нуқра ва 16 медали биринҷӣ ба даст оварданд.

Тибқи маълумоти пешниҳодшуда, ин нишондиҳанда нисбат ба ҳамин давраи соли 2025, ки донишҷӯён 57 медал соҳиб шуда буданд, 14 медал бештар мебошад. Аз ҷумла, шумораи медалҳои тилло 6 адад, нуқра 5 адад ва биринҷӣ 3 адад афзоиш ёфтааст.

Амир Иброҳимзода таъкид намуд, ки чунин дастовардҳо натиҷаи фаъолияти самараноки ҳайати омӯзгорону устодон ва мураббиёни Донишкада буда, аз рушди устувори варзиши касбӣ, баланд гардидани сатҳи омодагии донишҷӯён ва рақобатпазирии онҳо дар арсаи байналмилалӣ шаҳодат медиҳад.

Яҳё МАҲМАДНАБИЕВ, “ҶТ”