ё воқеан ҳам иқдоми шаҳрдори Душанбе сутуданист

Федератсияи байналмилалии ҷудо ҳамасола силсиламусобиқаҳои “Тоскулоҳи бузург” (Гран Слам, Гран При ва мусобиқотҳои қоравию ҷаҳонӣ)-ро тибқи тақвими расмии худ дар як қатор кишварҳои рушдкарда баргузор менамояд. То кунун дар кишвари зебоманзару паҳлавонпарвари тоҷик ягон мусобиқаи расмии Федератсияи байналмилалии ҷудо баргузор нашудааст. Бо назардошти рушди инфрасохтори замонавӣ ва имкониятҳои фароҳамовардаи Ҳукумати кишвар Федератсияи ҷудои Тоҷикистон бо ҳидоят ва дастгирии Пешвои муаззами миллат муҳтарам Эмомалӣ Раҳмон ва шаҳрдори Душанбе муҳтарам Рустами Эмомалӣ тасмим гирифт, то гуфтушунидҳоро бо Федератсияи байналмилалии ҷудо оид ба баргузории мусобиқаи расмӣ – “Grand Prix Dushanbe, 2023-2026” оғоз намояд. Дар натиҷа бо Федератсияи байналмилалӣ мувофиқа ба миён омад, ки шуруъ аз соли оянда ин мусобиқа дар Душанбе чор сол пайиҳам (солҳои 2023-2026) баргузор гардад.

Умаралӣ Сафаралӣ, менеҷери Департаменти коргузорӣ ва иттилооти Кумитаи миллии олимпии Тоҷикистон низ инро таъкид карда, гуфт, ки маҳз баргузории чунин мусобиқаҳои ҷаҳонӣ дар Тоҷикистон заминаи рушдро муҳайё мекунад.

- Иқдоми Федератсияи ҷудои Тоҷикистон дар мавриди баргузор кардани Гран Прии ҷудо дар Душанбе, ки бо дастгирии бевоситаи раиси шаҳри Душанбе, узви Кумитаи иҷроияи Шурои олимпии Осиё, муҳтарам Рустами Эмомалӣ роҳандозӣ мегардад, сутуданист.

Тавре мо мебинем, силсила-мусобиқаҳои сайри ҷаҳонии ҷудо дар кишварҳои гуногун дар сатҳи хеле баланд баргузор мешаванд. Чун ҳамаи мусобиқаҳои сайри ҷаҳонии ҷудо ба радабандии ҷаҳонӣ таъсир доранд, ҳамчунин варзишгарон маҳз тариқи радабандӣ ба Бозиҳои олимпӣ роҳхат мегиранд. Ба ғайр аз ин чунин мусобиқаҳо ҷоизапулии хуб ҳам доранд. Баргузор кардани чунин як мусобиқаи сатҳи байналмилалӣ дар баробари муаррифии Тоҷикистон ҳамчун як кишвари варзишӣ дар ҷаҳон, инчунин ба рушди бештари ин намуди варзиш мусоидат хоҳад кард,- гуфт У. Сафаралӣ.

Воқеан ҳам, баргузор гардидани чунин як мусобиқаи байналмилалӣ дар кишвар боиси боз ҳам рушд ёфтани варзиши кишвар мегардад. Зимни чунин мусобиқаҳои бонуфуз бештари варзишгарон метавонанд, таҷрибаву малакаи худро сайқал диҳанд.

Парвиз Нориён, муовини аввали раиси Федератсияи ҷудои Тоҷикистон низ баргузории ин мусобиқаро дар рушди варзиши кишвар такони ҷидди арзёбӣ намуд. Ӯ гуфт, ки баргузории ин гуна мусобиқа барои рушди ҷудо дар Тоҷикистон як такони хубе хоҳад бахшид, зеро зимни ин чорабинӣ шумораи бештари ҷудокорони тоҷик метавонанд, дар он иштирок намуда, таҷрибаву малакаро ҳам рушд намоянду ҳам аз дастгирии мухлиси худ илҳоми бештар гирифта, сазовори ҷойҳои намоён гарданд. Ҳамзамон наврасону ҷавонон аз мушоҳидаи паҳлавонии ҷудокорони муваффақи сайёра метавонанд, меҳру муҳаббатро ба ин намуди варзиш бештар ҳис намуда, ба ҷудо ҷалб гарданд.

- Бояд хотиррасон намуд, ки баргузории Гран При баҳри муаррифии Тоҷикистон ҳамчун кишвари рушдкардаву меҳмоннавоз, ободу осоишта ва замонавӣ як такони тозае хоҳад бахшид. Зеро ин гуна мусобиқотҳоро зиёда аз 100 кишвари сайёра пахш менамоянду зиёда аз 400 варзишгари қавии ҷаҳон ба кишвари тоҷикон хоҳанд омад. Тибқи таҷриба маълум аст, ки телевизионҳои муваффақи ҷаҳон аз қабили Евронюс, Евроспорт ва СНН ҳамчун шарики расмии Федератсияи байналмилалии ҷудо пайваста тарғиби ҳам мусобиқа ва ҳам кишвари мизбонро менамоянд. Интизор меравад, ки баргузории ин мусобиқа барои баланд бардоштани нуфузи Тоҷикистони соҳибистиқлолу рушдкарда ва меҳмоннавозу паҳлавонпарвар дар арсаи ҷаҳон як такони хубе хоҳад бахшид, - зикр кард Парвиз Нориён.

Коршиносон мегӯянд, ҷудо дар Тоҷикистон бо назардошти шабоҳаташ ба гӯштини тоҷикӣ миёни мардум хело мухлиси зиёд дорад. Зеро аксари он усулу қоидаҳои ин намуди варзиш аз гӯштини аҷдодии мардуми тоҷик асос гирифтааст. Ҳамин аст, ки мардуми тоҷик бо як завқу ҳавас ин намуди варзишро меписандад.
- Дар Тоҷикистон ҷудо ҳаводорони зиёд дорад ва дар толорҳо мебинем, ки наврасону ҷавонони зиёд ба ҷудо машғуланд. Дастовардҳои варзишгарони ин намуди олимпии варзиш низ назаррас аст. Масалан, аз 8 роҳхати олимпӣ, ки варзишгарони мо ба Бозиҳои олимпии Токио-2020 ба даст оварданд, 4 роҳхат дар намуди ҷудо буд. Ё аввалин медали Бозиҳои Осиё ва аввалин медали олимпиро ба Тоҷикистон маҳз ҷудочиён овардаанд. Умед дорем, ки ин мусобиқа дар шаҳри Душанбе дар сатҳи баланди ташкилӣ баргузор мешавад ва пас аз соли 2026 он ба Гранд Слам табдил меёбад, - гуфт дар идомаи суҳбат У. Сафаралӣ.

Муродалӣ Тешаев, шореҳи телевизиони “Варзиш” бар ин ақида аст, иқдоме, ки аз ҷониби раиси шаҳри Душанбе дастгирӣ гардид, саривақтӣ аст. “Агар варзишгарони мо аз як ҷиҳат холҳои даркорӣ ба Бозиҳои олимпии дар пеш истодаро ба даст оранд, аз ҷиҳати дигар метавонанд, барои таҷриба гирифтан ба мусобиқаҳои Гран Слам ва қаҳрамонии ҷаҳон ба Бозиҳои олимпӣ омода шаванд. Боварии комил дорам, ки ин мусобиқа чеҳраҳои навро кашф мекунад ва ба майдон меорад. Аз тамоми ҷиҳат ин метавонад, бис-ёр як нақши муҳим бозад”.

Ёдовар мешавем, ки ҷудо яке аз риштаҳои варзиши дӯстдоштани миёни мардуми тоҷик ба шумор рафта, ҳоло дар қаламрави кишвар дар марҳилаи нави инкишоф аст. Ҷудокорони бомаҳорати тоҷик, аз қабили Комроншоҳи Устопириён, Расул Боқиев, Темур Раҳимов, Эмомалии Нуралӣ ва дигарон борҳо бо ҳунарнамоиҳояшон дар мусобиқаҳои ҷаҳонӣ ҷудои тоҷикро ба ҷаҳониён муаррифӣ кардаанд. Агар ба таърихи кӯтоҳи рушди варзиши кишвар назар афканем, аёнамон мегардад, ки ин соҳа бо талошҳои пайвастаи Ҳукумати кишвар ҳамагӣ дар даҳсолаи дуюми соҳибистиқлолӣ ба рушди бемайлон ноил гардидааст.
Агар ба дастовардҳои ҷудокорони тоҷик назар афканем, солҳои охир варзишгарони мо дар чемпионатҳои Осиё, чемпионатҳои ҷаҳон, Гранд Слам ва Гран Приҳо иштирок намуда, натиҷаҳои хуб ба даст оварданд. Натиҷаи ба даст овардаи ҷудокоронро дар соли 2021 гирем, дар маҷмуъ 17 медал -1 тилло, 6 нуқра ва 10 биринҷӣ ба даст оварданд. Дар Чемпионати Осиё бошад, наврасону ҷавонон низ бо дасти пур ба ватан баргаштанд. Байни наврасон 3 медал ва боқимонда ҷавонон 5 медал, дар маҷмӯъ 8 медал ба даст оварданд.