Дар пойгоҳи сайёҳӣ, дар соҳили кӯли сеюми Ҳафткӯли шаҳри Панҷакент ниммарофони байналмилалии “ЭКО-Ҳафткӯл" баргузор гардид. Дар он намояндагони 23 сафорат, консулгарӣ ва созмонҳои байналмилалии муқими шаҳри Душанбе ба ҳайси иштирокчии фахрӣ ва беш аз 200 нафар дӯстдорони ин намуди варзиш аз 18 давлати ҷаҳон ширкат варзиданд.

Мусобиқаи имсола бо ибтикори Кумитаи кор бо ҷавонон ва варзиш, Кумитаи ҳифзи муҳити зист, Асоссиатсияи дав ва марафони Тоҷикистон ва Мақомоти иҷроияи маҳаллии ҳокимияти давлатии шаҳри Панҷакент баргузор шуд.

Маросими ифтитоҳи расмии ниммарафони байналмилалии “ЭКО- Ҳафткӯл-2026” бегоҳи рӯзи 1 август дар пойгоҳи сайёҳӣ дар соҳили кӯли сеюми Ҳафткӯл баргузор шуда, дар он раиси Кумитаи ҳифзи муҳити зисти назди Ҳукумати Ҷумҳурии Тоҷикистон, намояндагони Кумитаи рушди сайёҳӣ, Кумитаи кор бо ҷавонон ва варзиш, раиси шаҳри Панҷакент иштирок ва суханронӣ намуданд. Ба иттилои масъулин, соли панҷум аст, ки дар оғози моҳи август дар мавзеъи сайёҳию истироҳатии Ҳафткӯли шаҳри Панҷакент ниммарофони байналмилалии “ЭКО- Ҳафткӯл" роҳандозӣ мешавад.

Чорабинии экологию варзишии байналмилалӣ дар заминаи ташаббусҳои созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба масъалаҳои об, иқлим ва ҳифзи пиряхҳо ташкил шуда, ҳамчун намунаи ҳамоҳангии табиат ва фаъолияти устувори инсон ва тарғиби имкониятҳои табиии кишвар барои боз ҳам бештар ҷалб намудани сайёҳон мусоидат мекунад.

2 август беш аз 200 нафар иштирокчиёни ниммарфони кӯҳӣ дар масофаҳои 3, 10 ва 21 километр байни ҳам сабқат намуда, дар маросими ҷамъбасти ниммарафони байналмилалии кӯҳӣ ғолибон бо диплом ва мукофотҳо сарфароз гардонида шуданд.

С. ҚОДИРОВ,“ҶТ”