Темур Раҳимов, ҷудокори сангинвазни кишвар дар Бозиҳои Осиёии Ҳангжоу бо гирифтани мақоми дуюм барандаи нишони нуқраи ин мусобиқаи сатҳи баланд гардид.

То ба финал Темур ҳунарнамоии фавқулода нишон дод, мутаассифона дар даври ниҳоӣ муқобили рақибаш Магомедумар Магомедумаров мағлуб гардида, ба нишони нуқраи мусобиқа қаноат кард.

Темур дар даври аввал озод буд ва рақобатро дар даври чаҳорякниҳоӣ муқобили Ли Руйхуании мизбон оғоз кард. Дар ин рақобат Темур тавонист, ки бидуни мушкилӣ ҷудокори чиниро аз сари роҳ бардорад ва ба даври ниманиҳоӣ роҳ ёбад.

Дар даври ниманиҳоӣ Темур дар як рақобати сахту сангин муқобили Ким Минйонг аз Кореяи Ҷанубӣ дар вақти тиллоӣ бо имтиёзи вазарӣ зафар ёфта, ба финал баромад.

Ёдовар мешавем, ки дирӯз ҷудокорони тоҷик Сомон Маҳмадбеков (-81 кг) нишони тилло ва Беҳрӯз Хоҷазода (-73 кг) нишони биринҷӣ ба даст оварда буданд ва нишони Темур севвумин дастоварди варзишгарони тоҷик дар Бозиҳои Осиёии Ҳангжоу мебошад.

Я. МАҲМАДНАБИЕВ, “ҶТ”