Темур Раҳимов варзишгарест, ки барои баланд бардоштани ливои номус ҳамеша дар набард аст. Ӯ нафарест, ки барои муаррифӣ кардани давлат ва обрӯю нуфузи он дар арсаи гетӣ пайваста дар такопӯст. Соли равон корномаи ин таҳамтани гӯштин пур аз хотироти гуворо буд, чун ӯ дар Бозиҳои олимпии Париж-2024 дар вазни +100 кг рақобат намуда, медали биринҷӣ ба даст оварду Парчами Тоҷикистонро парафшон ва кишварро ба ҷаҳониён муаррифӣ намуд. Ин корномаи бемисли варзишгари номошнои меҳан дастовардест бузургу сутуданӣ. Кунун фишурдае аз суҳбатамонро бо Темур Раҳимов манзури шумо мегардонем.

- Агар соли 2024-ро соли шумо гӯем, иштибоҳ нахоҳем кард, чун дар ин сол баробари ғалаба дар мусобиқаҳои сайри ҷаҳонии ҷудо, ҷоизадори Бозиҳои олимпӣ гардидед. Чӣ эҳсосот доштед ҳангоми парафшон гаштани Парчами Тоҷикистон дар Бозиҳои олимпӣ?

- Баъди ҷароҳат бардоштан дубора ба майдон баргаштану дар майдонҳои ҷудои ҷаҳонӣ иштирок ва ҷоизадор шудан, бароям мояи ифтихору сарбаландист. Фикр мекунам, ки дар Бозиҳои олимпӣ соҳиби дастовард гаштан ва парафшон шудани Парчами Тоҷикистони азизамон на танҳо ба як варзишгари тоҷик, балки ба тамоми мардуми тоҷик як эҳсосоти хуш ва ногаҳонӣ мебахшад, ки боиси ифтихор аст.

- Шумо тамринро аз мактаби Боқиевҳо оғоз намудаед. То ҳол дар ин толор тамрин мекунед ва ё тамрингоҳи хешро иваз намудед?

- Чуноне маълум аст, дар ҳама соҳа бояд рӯ биёрем ба устод, то муваффақ гардем. Дар рӯзҳое, ки нахуст ба варзиш рӯ овардам, дар ноҳияи Рӯдакӣ як толори варзишӣ буд ва ман тамринро аз мактаби шодравон устод Боқиев Худойназар шуруъ намудам. Имрӯз кӯшиш мекунам, ки ҷавобан ба ғамхориҳои пайвастаи устодам, номбардори миллати тоҷик ва парчамбардори кишвари маҳбубам бошам. Ногуфта намонад, ки чанд муддат пас тамринро дар назди тағоям устод Абдураҳмонов Суҳроб идома додам.

- Тайи чанд сол мешавад, ки дар радабандии Федератсияи байналмилалии ҷудо байни сангинвазнон дар мақоми аввал қарор доред. Дар оянда боварӣ доред, ки ин мақомро аз даст намедиҳед?

- Сол то сол дар кишвар варзиш рушд ёфта истодааст ва таваҷҷуҳи роҳбарияти олии мамлакат, бахусус раиси шаҳри Душанбе муҳтарам Рустами Эмомалӣ ба варзишгарон зиёд аст. Раиси шаҳри Душанбе доимо дар мулоқотҳои худ бо варзишгарон чунин қайд мекунанд: “Бовар дорам, ки варзишгарони мо ҳангоми баромад дар хориҷи кишвар бо медалҳо бармегарданд”.
Хушбахтона, бо дастгириҳои доимии муҳтарам Рустами Эмомалӣ ба мусобиқаҳои берун аз ҷумҳурӣ сафар намудем. Ва ман тавонистам, ки бо дастовардҳои пайдарпай рақами яки ҷаҳон дар байни сангинвазнҳо бошам. Ин беҳтарин дастовард дар таърихи ҷудои кишвар ба ҳисоб меравад, ки ду сол (2022 ва 2023) дар рейтинги ҷаҳонӣ рақами як будам.

- Бо шарофати баромадҳои натиҷабори шумо чандин маротиба Парчами давлатӣ дар мусобиқаҳои байналмилалӣ ва рақобатҳои сайри ҷаҳонии ҷудо баланд гардид. Аз ҳама эҳсосоти фараҳбахш дар кадом мусобиқа шуморо фаро гирифт, ки эҳсоси ифтихор аз худ карда бошед?

- Ифтихор аз он мекунам, ки мо Пешвои миллат, Президенти варзишпарвар дорем, ки барои мо - варзишгарони бонангу номуси ин Ватани биҳиштосо тамоми шароитҳоро муҳайё намудааст. Ба сари баланд бояд гуфт, ки имрӯз мо дар қатори дигар давлатҳои абарқудрат дар тамоми мусобиқаҳои берун аз кишвар иштирок мекунем ва бо як мақсади асосӣ - мо бояд Парчами Ҷумҳурии Тоҷикистонро баланд бардорем.

Шукронаи он, ки дастовардҳои ман тули солҳои охир зиёд мебошанд. Ҳар як дастовардам бо заҳмату толошҳои зиёд ба даст омадааст, ки бароям ифтихороваранд. Қариб дар ҳамаи мусобиқаҳое, ки иштирок намудаам, медалҳои гуногунро ба Ватани азизам овардаам, ки ин бароям боиси хушнудист.

- Тайи чанд соли охир дастоварди ҷудокорони меҳан дар мусобиқаҳои фароҷумҳуриявӣ зиёд гардидааст. Ба назари шумо ин ҳама пешравиро сабаб чист?

- Хушбахтона, бо интихоб гардидани Исмоил Маҳмадзоир ба ҳайси президенти Федератсияи ҷудои кишвар шароит ва дастгириҳо ранги дигар гирифт ва ҷудокорони кишвар ба дастовардҳои бузурги варзишӣ ноил гаштанд.

- Боарзиштарин туҳфае, ки аз мусобиқаҳои ҷудо гирифтаед, кадом аст?

- Пас аз Бозиҳои олимпии Париж-2024 аз ҷониби Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба мо - варзишгарони кишвар, ҷоизаи давлатӣ - Ордени “Шараф” дараҷаи 2 ва аз маркази шаҳри Душанбе хонаи истиқоматӣ, мошини сабукрави барқӣ ва 200 ҳазор сомонӣ барои ба даст овардани медали олимпӣ туҳфа намуданд. Бубинед, ки бо як медали ба дастовардаамон нисбати мо, варзишгарон Сарвари давлат муҳтарам Эмомалӣ Раҳмон ин қадар ғамхориҳову дастгириҳо мекунанд. Ин ҳама дастгириву ғамҳориҳо мо-варзишгаронро водор месозад, ки медалҳои тиллоро ба хазинаи варзишии кишвар бештар ворид кунем.

- Барои расидан ба қуллаи баланди ҷудо ба назари шумо ҳамчун ҷудокори касбӣ чӣ бояд кард?

- Содиқ, қавӣ, устувор будан ва меҳнатро аз таҳти дил карда, бо боварӣ танҳо ба пеш қадам задан аст. Ва пеш аз ҳама дӯстдори касби интихобнамуда бояд буд.

- Дар ҳоли ҳозир барои кадом мусобиқа омодагӣ мегиред ва дар оянда чӣ мақсад пеши худ гузоштаед?

- Имрӯз орзуе, ки ҳар як варзишгари тоҷик онро дар қалбаш мепарварад, ин ба даст овардани медали тиллои Чемпионати ҷаҳон мебошад. Ман низ нақша дорам, ки ба хазинаи варзишии кишвар медали тиллои Чемпионати ҷаҳонро ворид кунам.
Имрӯз мо, мардуми саодатманди меҳан дар арафаи Рӯзи Парчами давлатӣ қарор дорем ва ман аз номи худам ва тамоми варзишгарони кишвар ҳамаи ҳамватанон, алалхусус парчамбардорони ин диёрро ба ин иди бузург табрику таҳният гуфта, таманнои онро дорам, ки Тоҷикистони соҳибистиқлол ҳамеша дар қатори пешрафтатарин давлатҳои абарқудрат бошад, оромӣ, сулҳу суботамон ҷовидонӣ бошад. Шиори ягонаи мо - варзишгарон, ин аст: “Тоҷикистон, ба пеш! Парчамбардорон, ба пеш!”.

Наҷиба МУРОДБЕКОВА, “ҶТ”