Дар Қасри фарҳанги шаҳри Истаравшан бахшида ба Рӯзи ҷавонони Тоҷикистон, ки ҳамасола 23 май бо шукуҳи хос таҷлил мегардад, чорабинии идона баргузор гардид. Дар ин бора аз Мақомоти иҷрояи ҳокимияти давлатии шаҳр хабар доданд.

Раиси шаҳри Истаравшан Абдусаттор Қодирӣ ҷавонон, иштирокдорони чорабиниро бо фарорасии Рӯзи ҷавонони Тоҷикистон таҳният намуда, илова намуд, ки ҷавонон неруи созанда ва ояндасози ҷомеа ҳастанд. Нақши онҳо дар рушди устувори давлат ва таҳкими пояҳои давлатдории миллӣ муҳим арзёбӣ карда мешавад.

Зикр гардид, ки дар ташаккул ва рушди сиёсати давлатии ҷавонон нақши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон беназир аст. Пешвои миллат дар баромадҳои худ оид ба дастгирии давлатии ҷавонон ва нақши онҳо дар рушду нумӯи Ватани азизамон ибрози андеша намуда, онҳоро такягоҳи боэътимоди давлат ва ояндасози дурахшон медонанд.

Дар охир, ҷавонони фаъоли шаҳр бо диплом, медал, ҷом ва туҳфаҳои хотиравӣ қадрдонӣ гардида, барномаи рангини фарҳангӣ хотири иштирокдорони чорабиниро шод намуд.

Субҳиддин ҚОДИРОВ, “ҶТ”