Дар тамоми уқюнусҳои олам ва ҳатто баҳрҳои алоҳида флоти ҳарбӣ–баҳрии ИМА, ҳамчун абарқудрат ҳузур дорад. Аз ҷумла, дар уқюнуси Ҳинд. Баҳри ҳимояи манфиатҳои худ ва иттифоқчиёнаш. Бояд зикр дошт, ки флоти баҳрӣ–ҳарбии ИМА дар ин ҷо тамоми навъҳои киштиҳои рӯиобию зериобиро дар ихтиёр дошта, дар ҳолати сар задани муноқиша омодаанд дар ҳудудҳои ҳариф тавассути мушаку тиру тӯпҳо ва тайёраҳои ҷангӣ аз болои киштиҳои тайёрабар ба фазо бархоста, тухми марг коранд.

Андак шиддат ёфтани вазъ моҳи июли соли 1988, яъне сивупанҷ сол пеш, боис шуд, яке аз тайёраҳои мусофирбари эронӣ, ҳангоми иҷрои хатсайр байни шаҳрҳои Бандар–Аббос ва Дубай, аз ҷониби яке аз киштиҳои ҳарбии дар ҳайати флоти 5–уми дар уқюнуси Ҳинд қарор доштаи ИМА мавриди ҳадафи мушак қарор гирад. Дар натиҷа қариб 300 нафар мусофир ва сарнишинони тайёра нобуд шуданд. Амрикоиҳо барои ин ҷиноят ва вайронсозии қонунҳои байналмилалӣ ҳатто узр пурсиданро барои худ раво надонистанд.

Ҳоло дар олам вазъи якқутбӣ ба амал омада, ҳарбиёни ИМА дур аз ҳудудҳои худ, дар обҳои бегона ҳамоно худсарии рӯирост нишон медиҳанд.

Чанд сол аст, ки ИМА тавассути СММ зидди Эрон бо ҳар баҳона таҳримоти иқтисодӣ ҷорӣ карда, мехоҳад иқтисодиёти кишвари исломиро то ҳади охир ноустувор созад. Дар ин маврид душмани ашаддӣ ва минтақавии давлати исломӣ – Исроил бо ҳар роҳу восита мехоҳад, амрикоиҳоро зидди эрониҳо шӯронад.

Ҳоло дар халиҷи Форс муноқиша байни эрониҳою амрикоиҳо дар забти киштиҳои нафташон аз ҷониби якдигар таҷассум меёбад. Чанд муддат пеш амрикоиҳо пайи ҳам ду кӯшиши эрониҳоро бобати забти киштиҳои нафткашон бартараф намуданд. Ба иттилои хабаргузориҳо, муддати тулонӣ, бори нахуст эрониҳо оташ кушодаанд. Аввал яке аз киштиҳои ҷангии эрониҳо дар гулӯгоҳи Ҳурмуз ба киштии нафтрасон фармони аз ҳаракат бозистоданро медиҳад. Сарпечӣ аз фармон боис мегардад, эрониҳо аз силоҳи вазнин оташ кушоянд. Ба ҷойи воқеа ҳозиршавии киштии ҳарбии амрикоиҳо боис мегардад, эрониҳо аз нақшаи худ даст кашида, ақибнишинӣ намоянд.

Ба гуфтаи коршиносони минтақа, ин дафъа на размандагони ҳомиёни сипоҳи инқилоби исломӣ, балки бевосита киштиҳои флоти ҳарбии Эрон дар амалиётҳо ширкат доштанд. Ба гуфтаи коршиносон, ин посух ба саъйи ИМА бобати бо ягон роҳ бо Эрон ба ифоқа расидан аст. Тавассути баъзе аз хабаргузориҳо маълумоте нашр гардид, ки гӯё байни амрикоиҳо ва эрониҳо гуфтушунуди хуфия ҷараён гирифтааст. Он ҷо амрикоиҳо таклиф доштаанд, ба шиддати муносибатҳо байни ҳар ду кишвар коҳиш бахшида шавад. Аз ҷумла, амрикоиҳо хоҳони онанд, ки минбаъд таҳримот ба муқобили давлати исломӣ роҳандозӣ нагардад. Аз афташ, саховати амрикоиҳо ба эрониҳо чандон мароқангез нанамуд, ки боз шиддати вазъ мушоҳида мегардад.

Дар шароити кунунӣ амрикоиҳо мавқеи худро торафт дар минтақа аз даст дода, дар дохили ИМА садое низ баланд мегардад, ки ҷойгиршавии флоти баҳриро дар халиҷи Форс сарфи беҳудаи хароҷот мешуморанд. Ва агар кор мабодо минбаъд бо чунин минвол идома ёбад, таниши нобаҳангом ба он оварда мерасонад, ки мумкин Эрон гулӯгоҳи Ҳурмузро баста монад. Ин бошад, боиси буҳрони шадиди энергетикӣ дар саросари олам мегардад.