Аз 2 то 6 май дар шаҳри Тошканди Ҷумҳурии Узбекистон 7-умин Фестивал-озмуни байналмилалии эҷодиёти кӯдакон ва ҷавонон “Роза Востока” (Садбарги Шарқ) баргузор шуд, ки дар он Маҳина Нурова аз Ҷумҳурии Тоҷикистон дар номинатсияи рақси ҳиндӣ сазовори Шоҳҷоиза гардид.

Дар ин бора аз Вазорати фарҳанги Ҷумҳурии Тоҷикистон хабар доданд.

Ба иттилои манбаъ, дар Фестивал-озмуни мазкур аз 7 давлат- Тоҷикистон, Қазоқистон, Қирғизистон, Узбекистон, Булғория ва Федератсияи Русия иштирок доштанд. Маҳина Нурова тибқи низомномаи озмун дар даври якум бо рақси хатлонӣ ва дар даври дуюм бо рақси ҳиндӣ баромад намуда, баҳои баланди аъзои ҳакамонро соҳиб гардид.

Хотиррасон мекунем, ки дар ин фестивал-озмун Тоҷикистонро 2 нафар Маҳина Нурова -ҳунарманди ансамбли рақсии Муассисаи давлатии “Кохи фарҳанги Суғдиён” ва Нозанин Шарифзода-донишҷӯи Коллеҷи санъати шаҳри Хуҷанд ба номи Содирхон Ҳофиз, ҳамзамон солисти Ансамбли созию овозии “Борбад”-и Муассисаи давлатии “Кохи фарҳанги Суғдиён” муаррифӣ намуданд.

 Наҷиба МУРОДБЕКОВА, “ҶТ”