Дар ҷумҳурӣ айни замон 76 ташкилоти телевизионӣ ва радиоӣ, аз ҷумла 13 телевизиони давлатӣ, 32 телевизиони ғайридавлатӣ, 10 радиои давлатӣ ва 21 радиои ғайридавлатӣ фаъолият доранд.

Дар ин хусус Маҳмадшариф Бобошозода, муовини аввали раиси Кумитаи телевизион ва радиои назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Гуфта шуд, ки Кумита дар шаш моҳи соли ҷорӣ аз чорабиниҳои сатҳи баланд, сафару мулоқотҳои Пешвои миллат муҳтарам Эмомалӣ Раҳмон ба шаҳру ноҳияҳои ҷумҳурӣ дар ҳаҷми 1330 дақиқа хабару гузоришҳои мустақим пахш намудааст. Фоизи фарогирии аҳолии ҷумҳурӣ бо пахши рақамии барномаҳои давлатии 6 шабакаи телевизионӣ бошад, ба 60,41% баробар аст.