Имрӯз соати 18:00 дар Театри давлатии академии опера ва балети ба номи Садриддин Айнӣ маросими ифтитоҳи Синамоҷашнвораи якуми байналмилалии Душанбе “Тоҷи Сомон” таҳти унвони “Таърихи рушди тоҷикон” баргузор мегардад.

Дар он меҳмонони зиёде аз давлатҳои Русия, Узбекистон, Молдова, Озарбойҷон, Чин, Фаронса, Ҳиндустон, Покистон, Қазоқистон ва ғайра ширкат мекунанд.
Дар доираи Синамоҷашнвора рӯзҳои кинои Федератсияи Русия дар Тоҷикистон, нишасти матбуотӣ, форуми байналмилалӣ бахшида ба 120-солагии коргардон, ҳунарпеша ва асосгузори кинои тоҷик Комил Ёрматов таҳти унвони “Эҳёи синамо” бо иштироки синамогарон, киношиносон ва мутахассиони соҳа, рӯзҳои кинои Ҷумҳурии Узбекистон дар Тоҷикистон, намоиши аксҳо бахшида ба шаҳри Душанбе таҳти унвони “Шаҳри ман-хонаи ман”, дарси “Устод ва шогирд” барои омӯзандагони Мактаби синамогарони ҷавон “Навомӯз” ба номи Муҳаббат Сатторӣ, ҷаласаи Шӯрои директорони киностудияҳои Иттиҳоди Давлатҳои Мустақил баргузор мешавад.

Рӯзҳои кинои давлатҳои хориҷӣ ва намоиши филмҳо дар кинотеатрҳои “Наврӯз”, “Кайҳон”, “Парфенон”, “Ватан” ва “Зебуннисо” сурат мегирад.

Маросими ҷоизасупорӣ ва барномаи фарҳангӣ 19-уми октябр, соати 18:00 дар Театри давлатии академии опера ва балети ба номи Садриддин Айнӣ доир мегардад.

Амони МУҲАММАД, коромӯзи “ҶТ”