Дар доираи иқдомҳои созандаи роҳбарияти шаҳри Душанбе ҳамарӯза симои пойтахт ва кӯчаву хиёбонҳо ба куллӣ дигаргун гардида истодаанд.

Шинондани ниҳолу дарахтони ороишӣ ва ҳамешасабз, ба гулзор табдил додани кӯчаву хиёбонҳои пойтахт ва боз ҳам ободу зебо гардонидани шаҳр мақсади асосии шаҳрдорӣ буда, имрӯзҳо ин амали нек ба таври дастаҷамъона анҷом дода мешавад.

Дар арафаи ҷашни Наврӯз бо ташаббуси Мақомоти иҷроияи ҳокимияти давлатии шаҳри Душанбе дар ҳудуди пойтахт корҳои ободонӣ ва кабудизоркунӣ бомаром идома доранд. Кормандони ташкилоту муассисаҳои пойтахт ҳамарӯза ба таври дастаҷамъона навъҳои гуногуни гулу буттаҳоро парвариш намуда, дар шафати роҳҳо, кӯчаву хиёбон ва марказҳои фарҳангию фароғатӣ мешинонанд. Шаҳрвандон низ дар корҳои ободонӣ ва сабзу хуррамгардонии ҳудуди шаҳр масъулияти дучанд эҳсос менамоянд.

Ҳадафи асосӣ аз роҳандозии хуррамгардонӣ ва ниҳолшинонӣ дар мамлакат тозаву озода нигоҳ доштани муҳити зист ва фазои экологӣ мебошад.

Амалӣ намудани иқдомҳои созанда ва ба таври муташаккилона ба роҳ мондани корҳои ободонию созандагӣ имкон фароҳам овардааст, ки пойтахт тадриҷан ободу зебо гардида, ба макони истироҳат ва фароғати сокинон ва меҳмонони он табдил дода шавад.