Дар арафаи Рӯзи матбуоти тоҷик маҷмуаи мақолаҳои рӯзноманигори ҷавон, корманди рӯзномаи “Хатлон” Ҷасури Қиёмиддин таҳти унвони “Нигоҳи ман” ба табъ расидааст.

Дар ин бора Носирҷон Маъмурзода, сармуҳаррири рӯзномаи “Хатлон” дар саҳифаи фейсбукии худ хабар додааст.

Дар маҷмуа силсилаи мақолаҳои муаллиф дар жанрҳои гуногуни эҷодӣ ҷамъоварӣ шуда, мавзуъҳои мубрами рӯзро фаро гирифтаанд. Ҳадаф аз таҳияи маҷмуа инъикоси мавзуъҳои иҷтимоӣ ва талоши ҷустуҷӯи роҳи ҳалли мушкилоти мавҷуда дар ҷомеа унвон мешавад.

Маъмурзода аз Ҷасури Қиёмиддин ҳамчун шогирди соҳибқаламу ояндадор ном гирифта, навиштааст, ки ӯ “парвардаи мактаби “устоду шогирд”-и идораи рӯзномаи “Хатлон” мебошад. Ҳамеша мекӯшад, ки аз майлонҳои нави журналистика ақиб намонад, абзорҳои таҳияи маводи журналистиро дар форматҳои гуногун ба кор барад, замонавӣ бошад. Мутмаинам, ки дар ҷодаи рӯзноманигорӣ ва публитсистика Ҷасури Қиёмиддин устуворона қадам ниҳода, ба дараҷаи баланди касбият мерасад, пирӯзу муваффақ мешавад”.