Дар арафаи ҷашни Истиқлолияти давлатӣ, аввалҳои моҳи сентябри соли ҷорӣ, дар ноҳияи Данғара бинои наву замонавии Қасри фарҳанг мавриди баҳрабардорӣ қарор хоҳад гирифт.

Ба иттилои Султон Раҷабов мудири Бахши кор бо ҷавонон ва варзиши ноҳия, сохтмони Қасри нави фарҳанг барои 700 ҷойи нишаст аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон анҷом дода мешавад. Ороиши саҳна ва васли таҷҳизоти саҳнавии ҳозиразамон бо мусоидати Вазорати фарҳанги Ҷумҳурии Тоҷикистон ба роҳ монда мешавад.

Қасри нави сеошёна ва замонавии фарҳанг аввалин Қасри фарҳанг дар ноҳияи Данғара хоҳад буд. Дар қасри нави фарҳанг толори консертии барҳаво, толори тамрин ва ҳуҷраҳои корӣ ҷой дода мешаванд.

Ҳоло дар ноҳияи Данғара Театри ҷумҳуриявии мусиқӣ-драмавӣ фаъолият дорад, ки дорои 400 ҷойи нишаст буда, бинои он собиқ Хонаи маданият, ки солҳои 60-и асри гузашта сохта шудааст, мебошад. Онро соли 2002 дар натиҷаи таъмир ва тармим ба театр табдил доданд.

Умед Мирзоев, “ҶТ”