ДИЁРИ НУРБОР
Мо Ватанро беҳ зи ҷон
Дӯст медорем, дӯст.
Сар ба рӯи санги роҳ
Дар Ватан хуфтан накӯст.

Обҳояш мисли қанд,
Боғу роғаш гулфишон.
Мардумаш меҳмоннавоз,
Маҳвашонаш дилситон.

Нозанин асту базеб
Ҷон Ватан, ҷонон Ватан.
Модар аст аз ростӣ,
Баҳри ҳар инсон Ватан.

Парчамаш пар мезанад
Мисли шоҳин дар фазо.
Умри ҷовидон ба ӯ
Аз Худо хоҳам, Худо.

Шукри Ҳақ, гаштам калон
Дар диёри нурбор.
Аз ватандории хеш
Менамоям ифтихор.

ВАТАН, ВАТАН
Мададрасони ҷон, Ватан,
Ба қалби ман мадор бош.
Манам дарахти сабзи шеър,
Маро ту такядор бош.

Ба пои ту ҳазор бор
Ниҳам саре, ки аз ман аст,
Ҳамеша мисли модарам
Базебчеҳра Меҳан аст.

Чи хуш, ки боз гаштаӣ
Ба чашми дӯстон ҷавон.
Макони Сулҳу Ваҳдатӣ,
Ту, эй диёри гулфишон.

Қаландарам, агар зи ту
Ниҳам ба мулки ғайр по.
Ман, эй Ватан, Ватан, даме
Нагардам аз барат ҷудо.

Нуруллоҳи ОРИФ, "ҶТ"