Шукрона, Шукрона

Шукри Истиқлолу сарвар мекунем,
Шукри ободии кишвар мекунем.
Шукри он зоте, ки моро ҳаст кард,
Шукри бому хонаву дар мекунем.
Давлати мо давлати сулҳофар аст,
Давлати озод дар баҳру бар аст,
Нест ин ҷо аз хазонӣ ҳеч ёд.
Мисли ҷаннат сабзу ҳам муаттар аст.
Одамон ин ҷо ба кори хеш банд,
Комашон ширин зи обу нону қанд.
Гаштаву баргашта гӯянд аз ҳаёт
Мӯсафедон баҳри тифлон панд, панд.
Кишварам, эй кишвари овозадор,
Шукри беши ҳазрати Парвардгор.
Бо дили саршор з-ишқу орзу
Додааст андар барат моро қарор.

Диёрам
Диёрам, ҷашни Истиқлол табрик,
Шукӯҳу шуҳрату иқбол табрик.
Ба ҳар як фарди бофазлат, банангат,
Дурахши бисту панҷум сол табрик.
Чу ҷаннат кард зебо Пешвоят,
Мақоми дил, мақоми дида ҷоят.
Мани ошиқ, мани масти ҳавасҳо,
Чу булбул месароям аз бароят.
Диёрам, ҷашни Истиқлол табрик,
Шукӯҳу шуҳрату иқбол табрик.
Ба ҳар як фарди бофазлат, банангат,
Дурахши бисту панҷум сол табрик.
Сано бар пешвоят, ки чунин кард,
Раҳоят сохт аз чанги ғаму дард.
Қасам бар зоти поке, ки маро зод,
Надидам бартар аз вай дар ҷаҳон мард.
Диёрам, ҷашни Истиқлол табрик,
Шукӯҳу шуҳрату иқбол табрик.
Ба ҳар як фарди бофазлат, банангат,
Дурахши бисту панҷум сол табрик

Тоҷикистон
(Попурӣ, дар се вазн)
Тоҷикистон давлат аст,
Тоҷикистон Ваҳдат аст.
Тоҷикистон мулки нур,
Тоҷикистон савлат аст.
Маъбади мо Тоҷикистон,
Маснади мо Тоҷикистон.
Тоҷикистон, бахту ҳам тахт,
Тоҷикистон, модари ҷон.
Бо ту меболам диёрам, эй диёр,
Бо ту меболам, диёри номдор.
Эй диёр, эй сарзамини бостон,
Меҳри ту дар қалби ман дорад макон.
Ту саропо кони ганҷӣ, кони ганҷ,
Дар канорат кас надорад дарду ранҷ.
Ҳар кӣ ояд, бинадат бо чашми дил,
Медиҳад умре баҳоят панҷ, панҷ.
Нозанинӣ, нозанин, эй ҷон, Ватан,
Ҷаннати пурфайзу пурэҳсон Ватан.
Рӯз рафта бо ҳазорон ранг, ранг,
Дар шукӯҳӣ, баҳри фарзандон Ватан.
Пешвоят фарди оламдида аст,
Гул зи гулзори ҳақиқат чида аст.
Баҳри ҳифзат аз хатар, аз чашми бад,
Ғунчавор аз мазраат сабзида аст.
Нуруллоҳи ОРИФ, "ҶТ"


Истиқлолият
Кӯдаки гаҳвора исён мекунад,
То кушояд дасту пои хешро.
Ишқи озодӣ ба майдон мекашад
Бандаи аз бандагӣ дилрешро .
Рӯҳи инсон-нури истиқлолро
Банд кардан роҳи дарё
бастан аст.
То ҷаҳон будасту то бошад ҷаҳон
Кори дарё бандро бигсастан аст.
Тоҷики озоди истиқлолхоҳ
Гуфт истиқлолу сар бар дор дод.
Ҷони ширин доду озодӣ харид,
Сар ба дор аз баҳри нангу ор дод.
Аз Фаридуну Каюмарсу Ҳушанг
То ба Рустам ҷанги истиқлол буд.
Гурзи душманафгани
Соми далер,
Баҳри истиқлол разми Зол буд.
Испатомону муқаннаъҳо басе
Андар ин раҳ ҷони
ширин бохтанд,
Оташи ҷомасафедонро баланд
Бо дирафши Ковиён афрохтанд.
Парчами мост он
дирафши Ковиён
Парфишон дар ҷашни
Истиқлоли мо.
То абад хуршедсон тобанда бод
Ҷашни Истиқлоли мо-иқболи мо.

Тоҷикистон–тахти ман
Куҳу саҳро, хоку обат бебаҳост,
Хандаҳои офтобат бебаҳост.
Чаҳ-чаҳи мурғони озоди ту хуш,
Нағмаи чангу рубобат бебаҳост,
Тоҷикистон,
Тоҷикистон, бахти ман,
Кишвари ман,
Минбари ман, тахти ман.
Куҳсорат чун сари тоҷик баланд,
Оби рӯду чашмасорат
ҳамчу қанд,
Чор фаслат чор рукни зиндагӣ,
Хушнавозу дилрабову
дилписанд,
Тоҷикистон,
Тоҷикистон, бахти ман,
Кишвари ман, тахти ман.
Сояи боли ҳумоям парчамат,
Файзи истиқлол файзи мақдамат,
Ту ба халқат, халқ бо ту арҷманд,
Муждаи иқбол бодо ҳар дамат,
Тоҷикистон,
Тоҷикистон, бахти ман,
Кишвари ман,
Минбари ман, тахти ман.
Мардхезу бешаи шерон туӣ,
Ормони Рустами Дастон туӣ,
Сафҳаи таърихи ту дарс
асту панд,
Ёдгори дудаи Сомон туӣ,
Тоҷикистон,
Тоҷикистон, бахти ман,
Кишвари ман,
Минбари ман, тахти ман.
Эй назаргоҳи Худо, лутфи Худо,
Хонаи умеди қавми Ориё,
Осмонат офтобӣ буду бод,
Бод фардои ту пурнуру зиё,
Тоҷикистон,
Тоҷикистон, бахти ман,
Кишвари ман,
Минбари ман, тахти ман!

Алимуҳаммад Муродӣ