Дар доираи Фестивали байналмилалии ҷавонон, ки дар минтақаи “Сириус” (Парки олимпӣ) -и шаҳри Сочии Федератсияи Русия ҷараён дорад, имрӯз китоби Муассисаи давлатии рӯзномаи “Ҷавонони Тоҷикистон” - “Душанбе – ганҷе дар қалби Осиё” ба китобхонаи “Сириус” тақдим гардид.



Китобро Шодихони Назар, сармуҳаррири рӯзномаи “Ҷавонони Тоҷикистон” ба китобхона бо соядаст тақдим кард.

Ёдовар мешавем, ки китоби “Душанбе - ганҷе дар қалби Осиё” аз ҷониби Муассисаи давлатии рӯзномаи “Ҷавонони Тоҷикистон” дар мувофиқа бо Мақомоти иҷроияи ҳокимияти давлатии шаҳри Душанбе таҳия ва нашр гардида буд.

Китоб маҷмӯи очерку мақолаҳоеро фарогир аст, ки дар доираи як озмуни ҷумҳуриявии рӯзномаи “Ҷавонони Тоҷикистон” ва Раёсати кор бо ҷавонон ва варзиши шаҳри Душанбе ҷамъоварӣ шудаанд. Ин озмун давоми соли 2021 ба муносибати пойтахти фарҳангии ИДМ интихоб шудани шаҳри Душанбе дар соли 2021 таҳти унвони “Душанбе – ганҷе дар қалби Осиё” идома пайдо кард ва дар арафаи таҷлили чорабинии ҷамъбастии “Душанбе – пойтахти фарҳангии иттиҳод – 2021” ҷамъбаст гардид.