Имрӯз 12 октябр дар толори Академияи илмҳои Ҷумҳурии Тоҷикистон ҷаласаи VI Шӯрои ҳамкорӣ дар соҳаи илмҳои бунёдии кишварҳои шомили Иттиҳоди Давлатҳои Мустақил баргузор гардид.

Тавре сомонаи расмии Академияи илмҳои Ҷумҳурии Тоҷикистон хабар медиҳад, академик Фарҳод Раҳимӣ – раиси Шӯрои ҳамкорӣ дар соҳаи илмҳои фундаменталии кишварҳои шомили ИДМ интихоб шуд.

Дар ҷаласа қайд гардид, ки барои баррасии лоиҳаҳои Шартнома дар бораи муносиботи байни давлатӣ дар мавриди таҳқиқоти фундаменталӣ ва таъсисёбии Фонди байнидавлатии тадқиқоти илмии кишварҳои шомили ИДМ кор идома дорад.

Гуфта мешавад, ки иштироккунандагони ин ҷаласа масъалаи ба муассисаҳои илмии кишварҳои шомили ИДМ додани мақоми ташкилоти асосӣ дар самти илмҳои фундаменталиро баррасӣ намуда, оқибат ба чунин хулоса омаданд, ки чунин мақом бояд ба Институти физикии Академияи илмҳои Россия ва Институти физикию техникии ба номи С.У.Умарови Академияи илмҳои Ҷумҳурии Тоҷикистон дода шавад.

Садбарги Раҳмиддин "ҶТ"