Донишҷӯёни ятиму бепарастор, имконияташон маҳдуди Донишгоҳи давлатии Хуҷанд ба номи академик Бобоҷон Ғафуров аз пардохти маблағи таҳсил ва истиқомат дар хобгоҳ озод карда шуда, ҳамзамон бо стипендияи ҳармоҳа таъмин карда шудаанд.

Дар ин бора Усмонзода Аюб Ислом, ректори Донишгоҳи давлатии Хуҷанд ба номи академик Бобоҷон Ғафуров 6 феврал зимни нишасти матбуотӣ хабар дод.

Номбурда дар идома гуфт, яке аз дастовардҳои бузург ва яке аз муҳимтарин рӯйдодҳо дар соли 2022 ин бо ҳидояту роҳнамоиҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оғози сохтмони бинои замонавии 9 ошёна бо 140 синфхона барои 4000 донишҷӯ ба ҳисоб меравад.

Ҳамзамон қайд гардид, ки дар давраи ҳисоботӣ Донишгоҳи давлатии Хуҷанд ба номи академик Бобоҷон Ғафуров аз ҷониби Агентии назорат дар соҳаи маориф ва илм ба сегонаи беҳтарин донишгоҳҳои ҷумҳурӣ дохил гардид.