Имрӯз, 28-уми сентябр, Президенти ҷумҳурӣ Эмомалӣ Раҳмон бо сафари корӣ ба ноҳияи Дарвоз рафт.

Сарвари давлатро дар варзишгоҳи Ҷамоати деҳоти Сағирдашт роҳбарияти вилояту ноҳия ва аҳли санъату фарҳанг бо меҳмоннавозии хоси мардуми кӯҳистони Дарвоз ва шодию нишоти беандоза истиқбол гирифтанд. Ҳунармандони Қасри фарҳанги ноҳия барномаи ҷолиберо бо омезиши санъати муосир ва расму ойинҳои миллӣ манзур намуданд.

Пешвои миллат, муҳтарам Эмомалӣ Раҳмон аз намоишгоҳи дастовардҳои хоҷагии халқи ноҳияи Дарвоз боздид ба амал овард. Дар намоишгоҳ намунаи ҳунарҳои дастиро, ки расму ойини аҷдодии мардуми кӯҳистонро таҷассум мекард, ба маъраз гузошта буданд. Модарони рӯзгордидаи ноҳия ҷараёни бо чархаи дӯғкашӣ гирифтани равғани маска ва дигар маҳсулоти аз лиҳози экологӣ тозаю хуштаъмро намоиш доданд.

Сокинони ноҳия бо истифода аз маҳсулоти гуногуни ширӣ, нонӣ, қаннодӣ ва дастранҷи барзгарону боғдорон, чорводорон ва занбӯриасалпарварон як гӯшаи намоишгоҳро зебу зиннат бахшиданд. Сардори давлат бо ҳунару маҳорат ва заҳмати меҳнаткашон шинос шуда, ҷиҳати рушд бахшидани соҳаи занбӯриасалпарварӣ дастуру супоришҳои мушаххас дод. Зикр шуд, ки сол то сол оилаҳои занбӯри асал дар минтақа бештар гардида, соли гузашта занбӯрпарварони ноҳия беш аз 60 тонна асали аз лиҳози экологӣ тозаю серғизо ҷамъоварӣ намуданд.

Сардори давлат ҳамзамон бо маҳсулоти корхонаҳои «Карон мармар», «Гавҳарнигор» ва ёдгориҳои таърихии шаҳраки Карон, инчунин маҳсули дасти занону духтарони корхонаи дӯзандагии «Меҳри модар» ошно шуд.

Ба дастовардҳои хоҷагии Кооперативии зотпарварии «Сағирдашт», ки ба парвариш ва нигоҳубини гӯсфанди маҳинпашм машғул аст, Президенти кишвар таваҷҷуҳ зоҳир карда, ҷиҳати барқарор кардани шуҳрати пешинаи он дастуру ҳидоятҳо дод. Дар ин ҷо ҳамчунин намудҳои зоти аспи тоҷикӣ, қутос ва гӯсфанди маҳинпашм ва ҳисорӣ ба намоиш гузошта шуда буд.

Сипас, Президенти ҷумҳурӣ дар маркази Ҷамоати деҳоти Сағирдашт бо гузоштани санги асос ва нома ба наслҳои оянда барои сохтмони муассисаи таҳсилоти миёнаи умумии рақами 2 барои 450 хонанда дар як баст оғоз бахшид.

Лоиҳа аз 16 синфхонаи таълимӣ, синфхонаи лингафонӣ, кабинетҳои биология, физика, химия бо озмоишгоҳ, синфхонаи компютерӣ, синфхонаҳои технология, ҳуҷраи кории директор, ҳуҷра барои ҷаласаҳои кумитаи падару модарон, китобхона бо толори хониш, толори маҷлисгоҳ бо 250 ҷойи нишаст, ошхона барои 130 ҷой ва толори варзишӣ бо 200 ҷойи нишаст иборат хоҳад буд.

Зимни шиносои бо лоиҳаи бино Пешвои миллат, муҳтарам Эмомалӣ Раҳмон ба роҳбарияти Вазорати маориф ва илм ва дигар шахсони масъул дастур дод, ки муассисаро бо риояи талаботи меъморию шаҳрсозӣ бунёд карда, ба сифати корҳои сохтмонӣ диққати аввалиндараҷа диҳанд.

Аз рӯи таъкиди Президенти мамлакат бино бо маблағҳои Ҳукумати Ҷумҳурии Тоҷикистон бунёд шуда, бояд солҳои зиёд ба насли зодаи истиқлол хизмат намояд.

Дар маркази Ҷамоати деҳоти Сағирдашт Сарвари давлат бо буридани лентаи рамзӣ Варзишгоҳи “Карон-Арена”-ро, ки дорои 400 ҷойи нишаст аст, расман мавриди баҳрабардорӣ қарор дод.

Президенти ҷумҳурӣ ифтитоҳи варзишгоҳи зеборо, ки аз ҷониби сохтмончиёни маҳаллӣ бо сифати баланд бунёд шудааст, туҳфаи арзишманди Ҳукумати мамлакат дар рӯзҳои ҷашни таърихии 25 - солагии Истиқлолияти давлатии Ҷумҳурии Тоҷикистон ба варзишгарону бошандагони ҷамоати деҳоти Сағирдашт арзёбӣ кард.

Варзишгарони ноҳияи Дарвоз барои чунин ғамхории арзанда баҳри ҷавонони ноҳия ва тарғиби тарзи ҳаёти солим изҳори сипосу минатдории худро ба Сардори давлат баён доштанд. Онҳо қавл доданд, ки дар баробари дигар варзишгарони номдори мамлакат аз сидқи дил машқу тамрин карда, дар мусобиқаҳои дохилию хориҷӣ парчамбардори Ватан хоҳанд шуд.

Дар шафати варзишгоҳ Парчами давлатии андозаи 5х2 бо пояи 20-метрӣ афрохта шуд.

Президенти ҷумҳурӣ, муҳтарам Эмомалӣ Раҳмон бо фаъолону сокинон суҳбату мулоқоти самимӣ намуд.

Таъкид гардид, ки дар баробари дигар минтақаҳои кишвар, дар замони Истиқлолияти давлатӣ, ноҳияи Дарвоз босуръат рушд намуд ва буҷети ноҳия аз 38 ҳазор сомонии соли 1992 то ба 19 миллион сомонӣ афзудааст. Бахусус дар ин давра ҷиҳати рушди соҳаҳои гуногун дар Ҷамоати деҳоти Сағирдашт таваҷҷуҳи зиёд зоҳир гардида, ин раванд то кунун идома дорад.

Пешвои миллат аснои суханронӣ таваҷҷуҳи ҳозиринро ба масъалаҳои рушди чорвопарварӣ, равнақ додани дигар бахшҳои соҳаи кишоварзӣ, беҳтар намудани вазъи роҳҳои мошингард ва ба роҳ мондани фаъолияти корхонаҳои нави саноатӣ дар ҳудуди ҷамоати деҳот ҷалб намуд.

Таъкид гардид, ки соли гузашта дар ду корхонаи заршӯии Сағирдашт бо маблағи қариб 4 миллион сомонӣ маҳсулот истеҳсол гардидааст ва таъсис додани корхонаи хурди коркарди пӯсту мӯина дар оянда метавонад ба масъалаи таъмин кардани аҳолӣ бо ҷойи кори доимӣ мусоидат намояд.

Тавре маълум аст, дар фасли зимистон роҳи мошингарди Ҷамоати деҳоти Сағирдашт ба маркази ноҳия тавассути ағбаи Хобуробод ба муҳлати шаш моҳ баста мешавад. Аз ин рӯ, ба масъулин ҷиҳати ҷудо намудани техникаву таҷҳизоти роҳсозӣ дастур дода шуд ва Вазорати нақлиёти кишвар вазифадор гардид, ки ҷиҳати бунёди шоҳроҳи Душанбе – Тавилдара – Қалъаи Хумб тавассути маркази деҳоти Сағирдашт пешниҳодҳои асоснок манзур намояд.

Аснои суханроӣ Пешвои миллат ба роҳбарони Вазорати маориф ва илм ва дигар сохтору мақомот супориш дод, ки шумораи квотаи Президентро барои фарзандони сокинони деҳоти Сағирдашт боз ҳам зиёд намоянд.

Сокинони Ҷамоати деҳоти Сағирдашт баромад карда, барои таъмини шароити созгори кору зиндагӣ ба Сарвари давлат изҳори сипос намуданд.

Дар идома Сарвари давлат дар маросими аз нав ба фаъолият оғоз намудани Қисми ҳарбии 02011 “Б”-и Қӯшунҳои зудамали Вазорати мудофиа дар ноҳияи Дарвоз иштирок намуд. Қисми низомии мазкур пас аз таъмиру тармими пурра мавриди баҳрабардорӣ қарор дода шуд, ки феълан дар он барои сарбозону афсарон шароити муосири хизматӣ ва маишӣ фароҳам оварда шудааст.

Пешвои миллат муҳтарам Эмомалӣ Раҳмон бо шароити фароҳамовардашуда дар ин қисми низомӣ аз наздик ошноӣ пайдо намуд ва бо афсарону сарбозон суҳбати самимӣ анҷом дод. Тавре маълум гашт, хобгоҳҳои сарбозон низ дар дохили қисми низомӣ мутобиқ ба талабот сохта шуда, дар дохили бинои он китобхона ва хонаи хизматӣ-маишӣ ҷой дода шудааст. Вобаста ба шароитҳои мавҷудаи қисми низомӣ, Президенти кишвар барои таълиму тарбияи сарбозон, бахусус наваскарон, баланд бардоштани ҳисси ифтихори миллӣ ва рӯҳану ҷисман омода намудани онҳо барои ҳифзи марзу буми Ватан ба масъулин дастуру супоришҳои мушаххас дод.

Иттилоъ дода шуд, ки дар ин қисми низомӣ ротаи таъиноти махсуси лижаронҳо амал мекунад, ки ҳайати шахсии он омодагии хуби ҷангӣ дошта, дар фасли зимистон, бахусус ҳангоми зиёд гардидани барф, имкон доранд вазифаҳои ҷангиашонро саривақт ва муваффақона иҷро намоянд.

Афсарону сарбозони қисми низомӣ зери оҳанги оркестри ҳарбии нафасӣ аз назди Сарфармондеҳи Олии Қувваҳои Мусаллаҳи мамлакат гузаштанд.