Таҳти ҳамин унвон дар ноҳияи Рӯшон бо ташаббуси мақомоти иҷроияи маҳаллии ҳокимияти давлатии (МИМҲД) ноҳия роҳпаймоии оммавӣ ва чорабинии идона баргузор гашт.

Нахуст роҳбарияти ноҳия, кормандони ҳифзи ҳуқуқ, ҷавонону варзишгарон, толибилмони МТМУ, кормандони идораву муассисаҳои маҳаллӣ ва намояндагони тамоми қишрҳои ҷомеа бо Парчами 20 метраи кишвар аз назди бинои МИМҲД-и Рӯшон то Қасри фарҳанги ноҳия ҳаракат намуданд.

Зимни баргузории маҷлиси тантанавӣ дар қасри мазкур муовини аввали раиси ВМКБ Алишер Мирзонаботов ва раиси ноҳияи Рӯшон Фарух Додихудоев ҳозиринро ба муносибати ҷашн табрику таҳният гуфта, Парчами миллиро рамзи иттиҳоду ягонагӣ, таҷассумгари матонату далерии халқ ва перӯзию пешрафти давлат унвон карданд.

Баъдан барномаи фарҳангии омоданамудаи санъаткорони Бахши фарҳанги ноҳия пешкаш шуда, аҳли толор то бегоҳирӯзӣ аз он ҳаловат бурд.