Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни сафари корӣ дар ноҳияи Тоҷикобод аз ҳолу аҳволи шахсони имконияташон маҳдуд ва ятимону бепарастон хабар гирифта, бо онҳо мулоқоти озоду самимӣ доир намуд.

Зимни мулоқот бо шахсони имконияташон маҳдуд раиси Кумита иброз доштанд, ки дар заминаи сиёсати оқилонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои шахсони имконияташон маҳдуд шароит фароҳам оварда шуда, ҳамеша таҳти ҳимояи давлат ва Ҳукумат қарор доранд. 

Таъкид гардид, ки барои шахсони имконияташон маҳдуд ҳар сол аз ҷониби Кумитаи кор бо ҷавонон ва варзиш курсҳои омӯзишии ройгон, аз қабили бофандагӣ, дузандагӣ, чармгарӣ, омӯзиши забонҳои хориҷӣ, қаннодӣ ва ороиши мую руй ташкил карда мешавад.

Дар доираи аёдати шахсони имконияташон маҳдуд аз ҷониби Кумита ба оилаи онҳо кӯмакҳои яквақтаинаи моддӣ расонида шуд.