Соли 2023 дар роҳҳои автомобилгарди Ҷумҳурии Тоҷикистон 294 садамаи ниқлиётӣ ба қайд гирифта шудааст.

Дар ин бора Азим Иброҳим, вазири нақлиёти Ҷумҳурии Тоҷикистон 8 феврал зимни нишасти хабарӣ иттилоъ дод.

Бино ба таъкиди вазир, дар натиҷаи ин садамаҳо 296 нафар маҷруҳ ва 223 нафар ба ҳалокат расидааст. Сатҳи садаманокӣ дар ин шумора нисбати ҳамин давраи соли 2022 18 фоиз зиёд аст. Инчунин фавтидагон 45 фоиз ва ҷароҳатбардоштагон 23 фоиз зиёд мебошад.

Вазири нақлиёти кишвар сабаби асосии рух додани садамаҳоро ба суръати баланди нақлиёт ва риоя нагардидани қоидаи ҳаракат дар роҳ аз ҷониби ронандагон рабт дод.

Ҳамзамон, вазир ин масъаларо шарҳ дода гуфт, ки айни замон барои пешгирии чунин ҳодисаҳо вазорат корҳои мушаххас анҷом дода истодааст.

- Таҳлилҳо нишон медиҳад, ки дар муассисаҳои роҳнигаҳдорӣ оид ба барқароркунӣ ва гузоштани аломатҳои роҳ сол то сол аҳамияти ҷиддӣ дода, соли 2022, 2335 ва соли гузашта 1800 адад аломатҳои роҳ гузошта шудааст, - гуфт вазири нақлиёт.