Тавре қаблан иттилоъ дода будем, нимаи дуюми дирӯз дар доираи форуми ҷавонон дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдорию давлатсозӣ” ҷавонони фаъол ва блогерони кишвар аз наҳияи Айнӣ дидан намуда, сипас аз мавзеъҳои таърихию фарҳангии шаҳри бостонии Панҷакент боздид намуданд.

Дар шаҳри мазкур баъди боздиди мақбара ва осорхонаи сардафтари адабиёти классики тоҷик Абӯабдуллоҳ Рӯдакӣ иштирокчиёни форум ба Осорхонаи ҷумҳуриявии таърихию кишваршиносии ба номи Абӯабдуллоҳи Рудакӣ рафтанд ва аз он дидан карданд.

Иштирокчиёни форум аз 8 толори осорхона, ба монанди толорҳои Саразми бостонӣ, Панҷакенти қадим, давраи Сомониён, Абӯабдуллоҳи Рӯдакӣ, давраи Шуравӣ, давраи Истиқлолият ва толорҳои табиату мардумшиносӣ боздид намуда, блогерон тамоми ёдгориҳои таърихии осорхонаи мазкурро бо аксу навор дар саҳифаҳои иҷтимоии худ таблиғ намуданд.

Сипас, ҷавонону блогерони фаъол озими шаҳри бостонии Саразм шуда, аз ёдгориҳои қадимаи Саразм дидан карданд.

Бегоҳии 27 апрел шоми дӯстии ҷавонон доир гардида, дар он ҷавонони фаъол ва блогерон баромаду суханронӣ намуданд.

Ёдовар мешавем, ки дар доираи форуми мазкур тибқи барнома иштирокчиёни он аз якчанд шаҳру ноҳияҳои дигари вилояти Суғд боздид хоҳанд кард, ки аз рафти он дар гузоришҳои оянда хабар хоҳем дод.