Барои сазовор истиқбол гирифтани ҷашни 30-солагии Истиқлолияти давлатӣ дар доираи 1300 рӯзи меҳнати зарбдор дар ноҳияи Деваштич корҳои ободонию бунёдкорӣ ҷараён дорад.

Бахшида ба ин ҷашн аз тарафи шахси саховатпеша, сокини деҳаи Далёни Поёни Ҷамоати деҳоти Далёни Боло Садрӣ Файзиев ба маблағи 1 миллиону 217 ҳазор сомонӣ дар деҳа барои 40 кат беморхонаи нав сохта шуда истодааст. Беморхонаи нав аз ду ошёна ва таҳхона иборат буда, шуъбаҳои ҷарроҳӣ, таваллудхона, касалиҳои дарунӣ ва бачагонаро дар бар мегирад.

Инчунин дар раванди корҳои ободонӣ Бинои нави дуошёнаи нозироти андози ноҳия, бо маблағгузории Кумитаи андози назди Ҳукумати ҷумҳурӣ, дар деҳаи Яхтани Ҷамоати деҳоти Яхтани ноҳия муассисаи томактабӣ барои 240 кӯдак, боғи фарҳангӣ - фароғатӣ бо нимпайкараи Қаҳрамони Иттиҳоди Шӯравӣ Ӯрунбек Ёқубов ва Маркази саломатӣ бунёд гардида истодааст.

Ба таъкиди масъулин айни ҳол дар Ҷамоати деҳоти Ғазантарак бо ташаббуси мардуми деҳа сохтмони майдони варзишӣ ба роҳ монда шудааст. Ҳамчунин соҳибкор Тӯйчӣ Абдуллоев Муассисаи таҳсилоти миёнаи умумии № 13 ба номи Исматулло Юлдошеви деҳаи Зарнисорро бо маблағи наздики 300 ҳазор сомонӣ таъмир намуданд, ки ин ҳама аз эҳсоси баланди ватандӯстии сокинони ноҳия дарак медиҳад.