Садорати Донишгоҳи миллии Тоҷикистон тасмим гирифтааст, ки барои чапи мақолаҳои илмӣ дар нашрияҳои байналмилалӣ устодону донишҷӯёнро бо маблағи пулӣ ҳавасманд гардонад.

Дар ин бора имрӯз - 23 июл Эмомалӣ Насриддинзода, ректори ДМТ дар нишасти хабарии худ иттилоъ дод.

Бино ба гуфтаи ректор, Донишгоҳ тасмим гирифт, ки ҳавасмандгардонии устодону кормандони Донишгоҳ барои нашри мақолаҳои илмӣ дар маҷаллаҳои илмии тақризшавандаи Scopus sa Web of Science-ро муқаррар намояд. Аз ҷумла, дар асоси қарори Шурои олимони Донишгоҳ аз 29.03.2024 ба устодону кормандони асосии Донишгоҳ мувофиқан 3000 (се ҳазор) сомонӣ барои мақолаи як муаллиф ва ҳангоми дар ҳаммуаллифӣ нашр намудани мақола 2000 (ду ҳазор) сомонӣ мукофотпулӣ тақдим мегардад.

Бояд қайд кард, ки дар ин самт, бо қарори Шурои олимон барои омӯзгорону кормандони асосии Донишгоҳ, ки дар соли 2024 рисолаҳои номзадиву доктори фалсафа (доктор аз рӯйи ихтисос Ph.D), докторӣ ва доктор ҳабилитат ҳимоя менамоянд, мувофиқан 20 000 (бист ҳазор) сомонӣ ва 30 000 (сӣ ҳазор) сомонӣ ҳавасманд гардонида мешаванд.