Донишҷӯёни Донишкадаи тарбияи ҷисмонии Тоҷикистон ба номи С. Раҳимов дар мусобиқаҳои байналмилалӣ иштирок намуда, ҷойҳои намоёнро ишғол кардаанд.

Дар ин маврид ректори донишкадаи мазкур Шодӣ Сафаров имрӯз зимни нишасти хабарӣ иттилоъ дод.

- Дар Чемпионати Осиё оид ба бокс байни ҷавонон, ки дар шаҳри Тошкент доир шуд, се нафар донишҷӯёни бахши 3-юми факултети тарбияи ҷисмонӣ Болтаев Абдумалик дар вазни 75кг ҷойи дуюмро, Аброриддинов Муҳаммад дар вазни +92 кг ҷойи дуюм ва донишҷӯйи бахши 3 -юми факултети варзиш Аҳадов Расул ҷойи сеюмро дар вазни 67 кг ишғол намуданд, - гуфт номбурда.

Ҳамзамон ӯ қайд намуд, ки дар Чемпионати Осиё оид ба кураш, ки рӯзҳои 22-23 марти соли 2022 дар шаҳри Душанбе доир гардид, варзишгарони ин даргоҳ 1 медали нуқра ва ду медали биринҷӣ ба даст оварданд.