Ба таъкиди масъулини мақомоти иҷроияи ҳокимияти давлатии шаҳри Душанбе дар нимсолаи аввали соли 2020 тавассути мусоидати мақомоти меҳнат ва шуғли аҳолӣ 3862 нафар шаҳрвандони бекор бо ҷойи кор таъмин карда шуданд, ки дар муқоиса ба ҳамин давраи соли гузашта 1750 нафар ё 31,1 фоиз кам мебошад.

24 июл дар ин бора зимни нишасти хабарии мақомоти иҷроияи ҳокимияти давлатии шаҳри Душанбе иттилоъ дода шуд.

Ҳамзамон вобаста ба касбомӯзии шаҳрвандон дар пойтахт гуфта шуд, ки бо мақсади омӯзиши касбу ҳунар 1244 нафар шаҳрвандони бекор ба курсҳои кутоҳмуддати касбомузӣ сафарбар карда шуданд. Касбомӯзии шаҳрвандон аз рӯи 19 намуди касбу ихтисосҳои гуногун роҳандозӣ гардидааст.

- Ҷиҳати паст намудани сатҳи бекорӣ дар ҳудуди шаҳри Душанбе 15 маротиба ярмаркаи ҷойҳои кории холӣ ташкилу баргузор карда шуда, тавассути он 335 нафар шаҳрвандони корҷӯй бо ҷойи кори доимӣ таъмин гардиданд, - гуфта шуд дар нишаст.