Паҳлавони ҷавони тоҷик Муҳиддин Асадуллоев дар Бозиҳои XX Осиё-2026 дар шаҳри Айчии Ҷопон дар риштаи ҷудо, дар вазни то 73 кг сазовори медали биринҷӣ гардид.

Асадуллоев, ки дар остонаи ин мусобиқа дар раддабандии ҷаҳонии IJF дар вазни то 73 кг мақоми аввалро соҳиб буд ва аз ин рӯ рақобатро аз марҳилаи 1/8-финалӣ оғоз кард. Дар ин давр ӯ бар намояндаи Шри-Ланка Чамара Нуван ғолиб омада, роҳашро ба даври дигар ҳамвор намуд.

Паҳлавони тоҷик дар идомаи рақобатҳо ба марҳилаи чорякфиналӣ ва сипас ба нимфинал роҳ ёфт. Дар вазни то 73 кг 16 варзишгар барои медалҳои Бозиҳои Осиё мубориза бурданд. Дар байни иштирокчиён, аз ҷумла, Шаҳрам Аҳадов аз Узбекистон, Казбек Нагучев аз Имороти Муттаҳидаи Араб, Татсуки Исихара аз Ҷопон ва Бахитжан Абдурахмонов аз Қазоқистон ҳузур доштанд.

Дар марҳилаи нимфиналӣ Асадуллоев натавонист роҳашро ба рақобати ниҳоӣ идома диҳад ва ба мубориза барои медали биринҷӣ роҳ ёфт. Дар ин рақобат паҳлавони тоҷик бо намояндаи Муғулистон Энхдул Лхамаа қувваозмоӣ карда, бар рақибаш пирӯз шуд ва медали биринҷии Бозиҳои Осиё-2026-ро ба даст овард.

Бояд гуфт, ки Лхамаа барои Асадуллоев рақиби ошност. Онҳо қаблан дар мусобиқаҳои байналмилалӣ низ бо ҳам рӯ ба рӯ шудаанд. Аз ҷумла, дар “Dushanbe Grand Slam 2025” Асадуллоев бар паҳлавони муғул пирӯз шуда буд.

Ҳамин тариқ, Муҳиддин Асадуллоев ба Тоҷикистон боз як медали Бозиҳои Осиёии Айчи-Нагояро овард.

Яҳё МАҲМАДНАБИЕВ, “ҶТ”