Бахшида ба 26-солагии Истиқлолияти давлатии Ҷумҳурии Тоҷикистон дар Театри вилоятии мусиқӣ-мазҳакавии ба номи Ато Муҳаммадҷонови шаҳри Қӯрғонтеппа конфронси вилоятӣ дар мавзӯи «Истиқлолият - шарафу номуси ватандорӣ» баргузор гардид.

Махфират Хидирзода, муовини раиси вилояти Хатлон, ҳамагонро ба 26-умин солгарди Истиқлолияти давлатии Ҷумҳурии Тоҷикистон табрику таҳният гуфта, таъкид дошт, ки истиқлолият ҳамчун рамзи муҳими давлатдорӣ василаи беҳтарини шинохти миллатҳо дар арсаи ҷаҳонӣ буда, соҳибистиқлол гаштан ин марҳилаи аввали расидан ба мақсади худсозӣ мебошад.

Дар конференсия ёдовар шуданд, ки истиқлолияти давлатӣ арзишмандтарин дастоварди миллати фарҳангсолори тоҷик буда, барои бунёди давлатдории навин, рушди соҳаҳои сиёсиву иқтисодӣ, иҷтимоиву ҳуқуқӣ ва эҳёи арзишҳои миллӣ заминаи боэътимод фароҳам овардааст.

Бахтовар Сафарзода, вакили Маҷлиси намояндагони Маҷлиси Олии Ҷумҳурии Тоҷикистон, зикр кард, ки: “Дар тӯли 26 соли истиқлолияти давлатӣ тамоми рамзҳои давлати соҳибихтиёр шакл гирифт, ки имрӯз дар самти рушд додани эҳсоси ватанпарастӣ ва давлатмеҳварии шаҳрвандон васеъ истифода мешавад”.

Дар охир, аз тарафи ҳунармандон чорабинии фарҳангӣ пешкаши иштирокчиён гардонида шуд.

Умед МИРЗОЕВ, “ҶТ”