Бо ибтикори Шуъбаи кор бо ҷавонони назди Донишгоҳи давлатии Хоруғ дар ҳамкорӣ бо Бахши ҷавонон, варзиш ва сайёҳии шаҳр  дар боғи фарҳангӣ – фароғатии “Чорбоғ” аксияи тарғиботиву ташвиқотии ҷавонон зери унвони “Ҳаёти солим интихоби мост!”  баргузор гардид.

Дар аксияи мазкур зиёда аз 50 нафар ҷавонони фаъол иштирок намуда, байни сокинони вилоят 1400 варақаи тарғиботиву иттилоотӣ вобаста ба пешгирии бемориҳои сироятӣ, аз қабили ВНМО ва БПНМ-ро тақсим намуданд. Ҳамчунин, бо мақсади баланд бардоштани сатҳи маълумотнокии аҳолӣ, бахусус ҷавонону наврасон оид ба бемориҳои сироятӣ аз ҷониби ризокорон ва ташкилкунандагон машваратҳо дода шуд.  

Дар ин росто қайд гардид, ки соли гузашта дар қаламрави вилоят 56 нафар сироятёфтагони Вируси норасоии масъунияти одам ба қайд гирифта шуда буд. Дар миқёси вилоят 535 нафар сироятёфта дар қайди Маркази мубориза бар зидди ВНМО-и ВМКБ аст, ки аз ин теъдод 109 нафар занон мебошанд. Дар чанд соли охир дар вилоят аз шумори сироятёфтагон 234 нафар ба ҳалокат расидааст

Дар фарҷом ташаббускорону фаъолони аксия аз ҷониби Шуъбаи кор бо ҷавонони ДДХ ва Бахши ҷавонон, варзиш ва сайёҳии шаҳри Хоруғ бо мукофоту ифтихорномаҳо қадрдонӣ шуданд.

Машҳур ИМОМНАЗАРОВ, “ҶТ”