Бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон аз моҳи май то ноябри соли гузашта дар мавзуи "Нақши Китоби сурхи Ҷумҳурии Тоҷикистон дар ҳифзу нигоҳдории гуногунии биологӣ ва захираҳои табиӣ" мизи мудаввар баргузор шуда, масоили тартибу талабот ба критерияҳои ворид намудани намудҳои нодири набототу ҳайвонот ба Китоби сурхи Ҷумҳурии Тоҷикистон муҳокима гардидааст.

Дар ин хусус Баҳодур Шерализода, раиси Кумитаи ҳифзи муҳити зисти назди Ҳукумати кишвар зимни нишасти хабарии ин ниҳод 31 январ маълумот дод.
Гуфта шуд, ки вобаста ба ин 17 адад мақолаҳои илмӣ таҳия ва барои нашр пешниҳод гардиданд. Аз ҷумла, ходимони илмӣ доир ба баҳогузории экологии ландшафтҳои табиии чарогоҳҳо корҳои илмӣ-амалиро анҷом доданд.

Дар ин радиф аз он изҳори нигаронӣ карда шуд, ки ҳолати паст шудани ҳосилнокии чарогоҳҳои зимистона аз 35 фоиз то 53 фоиз мушоҳида мешавад, зеро нигоҳдории чорво дар чарогоҳҳои зимистона аз меъёри экологӣ аз 5 то 6 маротиба зиёд гардида, ҳолати нигоҳдории реҷаи чаронидани чорво дар аксар чарогоҳҳои зимистона риоя намешавад.