Зимни нишасти хабарии ҶСК “Барқи тоҷик”, ки 13 феврал доир шуд, саволи асосии мавриди назари аксари рӯзноманигорон вобаста ба маҳдудияти неруи барқ пас аз сардиҳои моҳи январ буд, ки дар посух ба он Маҳмадумар Асозода, раиси ҶСК “Барқи тоҷик” чунин гуфт:

“Дар ширкати “Барқи тоҷик” вобаста ба ҳар як давраи фаъолият хоҳ давраи тобистон бошад, хоҳ зимистон тавозуни обу энергетикӣ тартиб дода мешавад. Неругоҳи барқи обии “Норак” танҳо неругоҳи мавсимӣ аст ва бо сабаби номусоид ва сард омадани боду ҳаво дар моҳи январ бо дастури Ҳукумат мо муваққатан маҳдудияти неруи барқро қатъ кардем. Ин боис гашт, то сатҳи об дар обанбор зиёда аз 4м паст гардад”.

Номбурда ҳамчунин гуфт, ки дар ҳолати гарм шудани ҳаво, зиёд шудани резиши об ва дар сатҳи зарурӣ баромадани оби обанбор маҳдудияти неруи барқро пурра қатъ мекунанд.

Ҳ. РАҲМАТУЛЛОЕВ, “ҶТ”