Ё муҳаббатномаи шоири ватансаро дар остонаи ҷашни Истиқлол

Шоми 3 сентябри соли равон бахшида ба ҷашни Истиқлоли давлатӣ бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар “Кохи Суруш”-и шаҳри Душанбе таҳти унвони “Меҳри Ватан” шоми эҷодии Шоири халқии Тоҷикистон, барандаи Ҷоизаи давлатии ба номи Абӯабдуллоҳи Рӯдакӣ, ва Ҷоизаи адабии Ассамблеяи байнипарлумонии ИДМ ба номи Чингиз Айтматов Муҳаммад Ғоиб баргузор гардид.

Дар шоми мазкур Зулфиқор Гулаҳмадзода - раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Азизӣ Абдуҷаббор Абдуқаҳҳор - муовини якуми раиси Ҳизби Халқии Демократии Тоҷикистон, Дилбар Одилзода - муовини раиси шаҳри Душанбе, Маликшо Неъматзода - раиси Федератсияи иттифоқҳои касабаи мустақили Тоҷикистон, Низом Қосим - раиси Иттифоқи нависандагони Тоҷикистон, намояндагони вазорату идораҳо, ходимони илму фарҳанги кишвар ва дӯстдорони каломи меҳри шоири маҳбубу ватансаро Муҳаммад Ғоиб иштирок ва суханронӣ намуданд.

Шоми эҷодӣ бо намоиши филми мустанад доир ба ҳаёт ва фаъолияти Шоири халқии Тоҷикистон Муҳаммад Ғоиб оғоз гардид.
Сипас, Шоири халқии Тоҷикистон Муҳаммад Ғоиб барои баргузории як чорабании сатҳи баланд ба масъулин изҳори сипос намуда, чанд шеъри худро қироат намуд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суханронии хеш нахуст ҳамаи иштирокчиёни маҳфили адабиро ба ифтихори 33 – юмин солгарди ҷашни Истиқлоли давлатӣ самимона шодбош гуфта, ба шоири ватансарову маҳбуби дилҳо Муҳаммад Ғоиб изҳори миннатдорӣ намуда, таъкид кард: “воқеан Шоири халқии Тоҷикистон Муҳаммад Ғоиб аз саромадони шоирони ватанпарвар ва ватандӯсти тоҷик буда, муҳтавои асосии ашъори ӯро Ватан, Тоҷикистон, пос доштани хоки ин сарзамини биҳиштосо ва рамзҳои муқаддаси миллӣ ташкил медиҳад. Лирикаи гарму нарм ва ватандӯстонаи шоир дар шакли суруду шеъру таронаҳои дилкушо дар дилу дидаи мардум ва бахусус ҷавонон ҷо гирифтааст. Бештари ашъори ин шоири ватандӯст ба худогоҳӣ ва хештаншиносӣ бахшида шудааст”.

- Бояд гуфт, ки мо - насли ҷавон ба ҳамаи хизматҳои шоистаи тамоми бузургони миллати тоҷик арҷ мегузорем, пайравӣ мекунем ва онҳоро азиз медорем, чун муҳаббатномаи Ватанро аз ашъору қалами сабзи шумо меомӯзем, - илова намуд раиси Кумита.

Баъди суханронӣ аз ҷониби раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба шоири ватансаро Муҳаммад Ғоиб, ки дар номинатсияи назми озмуни байналмилалии “Осиёи адабӣ – 2023” дар Ҷумҳурии Қазоқистон миёни 64 кишвари иштирокчӣ мавқеи сазоворро ишғол намуда буд, диплом, Гран при ва медали Иттиҳоди байналмилалии дипломатияи халқҳои Осиё супорида шуд.

Ҳамчунин, Дилбар Одилзода, муовини раиси шаҳри Душанбе доир ба ашъори пурмазмуни шоири ватансаро Муҳаммад Ғоиб андешаҳояшро чунин баён намуд: “Имрӯз ашъори баландмазмуни ӯ дар байни мардум мақоми баланд пайдо кардааст. Ӯ муаллифи чандин асарҳо, аз ҷумла “Ватандорӣ” “Хоки Ватан”, “Ориёӣ”, “Фарёди ёдҳо”, “Меҳри гиёҳ”, “Хоки ватан”, “Гавҳари меҳр”, “Нури дида”, “Боми сипеҳр”, “Гумгаштапайдо”, “Роҳи каҳкашон”, “Сад ғазал”, “Поси ошноӣ”, “Парчами нанг”, “Даъват”, “Каъбаи дил”, “Подарок”, “Тоҷикистон Ватани Наврӯз аст” ва ғайра мебошад, ки имрӯз мо аз онҳо ғизои маънавӣ мегирем”.
Дар идома Шодихони Назар, сармуҳаррири рӯзномаи “Ҷавонони Тоҷикистон”, Шоири халқии Тоҷикистон Муҳаммад Ғоибро бо маҳфили эҷодиаш шодбош гуфта, аз номи ҳайати эҷодии рӯзнома ба ӯ туҳфаи хотиравӣ тақдим кард.

Ҳамчунин, ба ин муносибат, ки шумораи махсуси рӯзномаи “Ҷавонони Тоҷикистон” ранга аз чоп баромада буд, ба устод тақдим карда шуд.

Дар охир барои болида гаштани табъи иштирокчиён сарояндагон аз ашъори шоир сурудҳои ватандӯстонаро замзама намуда, ба маҳфил ҳусни дигар бахшиданд.

Наҷиба МУРОДБЕКОВА,
Гулафшон КАРИМОВА,
“ҶТ”