Инсон дар тӯли зиндагиаш ҳамеша дар ҷустуҷӯ аст. Пайвас-та кӯшиш мекунад, ки рӯзгорашро бе мушкилӣ гузаронад. Талош кардан, заҳмат кашидан шахсро ба мартабаҳои баланд мерасонад. Дар ҳаёти имрӯза чунин инсонҳо бис-ёранд. Онҳо бо касбу маҳорат на фақат худ, балки кишвари худро дар арсаи байналмилал муаррифгаранд. Бахусус ихтироъкорон.

Мавлуда Давлатмамадова, омӯзгори ҷавони Донишгоҳи миллии Тоҷикистон аз зумраи чунин ихтироъкороне мебошад, ки дар Форуми 15-уми ихтироъкорони ҷаҳон соҳиби медали тилло ва дип-лом гардид. Ин форум 11-12 майи соли равон бо иштироки 150 ихтироъкорони дунё аз 50 давлат дар шаҳри Катовитсияи Полша баргузор гардида, дар он Мавлуда ду ихтирои худро муаррифӣ кард. Соли 2019 ӯ дар Фаронса соҳиби медал ва дар Эрон бо ҷоизаи махсус қадрдонӣ шуда буд.

Мавлуда Давлатмамадова айни ҳол омӯзгори кафедраи химияи татбиқии факултети химияи ДМТ мебошад. Ӯ солҳои зиёд аст, ки мекӯшад дар илми химия навгонӣ ворид кунад. Ва ҳамин тариқ як дастгоҳи технологии коркард ва истифодабарии маъдани талк, инчунин маводи доруворӣ барои аллергияи пӯст ихтироъ кард. Ӯ мегӯяд, ки ҳангоми муаррифии кор ҳама намояндагони дигар давлатҳо баҳои баланд дода, офарин хонданд.

“Аз он хулоса баровардам, ки ихтироъкор бояд ҳамеша озод бошад. Озодандешӣ ӯро ба мартабаҳои баланд мерасонад. Шахси ихтироъкор ҳангоми озод будан фикри мукаммалтар мекунад ва он натиҷаи хуб медиҳад. Ҳолатҳое буданд, ки фикр дар сарам ними шаб пайдо мешуд ва ҷои хоб хеста онро рӯйи коғаз меовардам. Дар баробари ин ҳамеша меомӯхтам, то аз нозуктарин паҳлуҳои илм бохабар гардам,-иброз намуд, Мавлуда.

Қаҳрамони мо дар оилаи зиёӣ бузург шудааст. Ба қавли Мавлуда падарбузургаш низ ихтироъкор будааст.

Дар соҳаи химия ӯ аз хориҷи кишвар се медали тилло ва як медали нурқаро ба ватан овардааст.

Ду ихтирои ахири Мавлуда яке дар соҳаи тиб ва дигаре дар соҳаи истеҳсолот бояд истифода шавад.
Ихтирои дар соҳаи тиб нигаронидашудааш дору барои мубориза алайҳи бемории пӯст саглес ё аллергия мебошад. Ӯ мегӯяд табибон бештари ин намуди бемориро дар истеъмол намудани ҳар гуна донагиҳо медонанд ва табобати он низ тӯлонист. Маводи дорувории Мавлуда метавонад, ба шахсони гирифтори ин беморӣ кӯмак расонад ва беморон ба осонӣ аз он шифо ёбанд.
Ихтирои дуввум бошад, дар истеҳсоли коғаз, куллогароӣ, сохтмон ва дигар соҳаҳо истифода хоҳад шуд.

Баъди муаррифӣ намудан ва сазовори ҷойи намоён гардидан, ӯ бо ду донишгоҳи Лаҳистон ҳамкориро ба роҳ мондааст.

Мавлуда ба ҷавононе, ки ихтироъкор ҳастанду мехоҳанд муваффақ бошанд, таъкид мекунад, ки бояд ҳаргиз дилшикаста нашаванд ва пайваста маҳорати худро боло баранд.
- Бо боварии комил метавон гуфт, ки ҷавонони тоҷик дониши баланд доранд ва онҳо метавонанд, дар дилхоҳ соҳаҳо бо ихтирооти нав ба нави худ муваффақ гарданд,-гуфт Мавлуда дар охири суҳбат.