Имрӯз дар Донишкадаи давлатии фарҳанг ва санъати Тоҷикистон ба номи Мирзо Турсунзода ба ифтихори Рӯзи Президент тамошои филми "ПЕШВО"-и рӯзномаи "Ҷавонони Тоҷикистон" дастаҷамъона, бо ҳузури устодону донишҷӯёни донишкада ва меҳмонон доир гардид.

Ректори донишкада профессор Низомӣ Муҳриддин Зайниддин дар ибтидо ҳозиринро бо ин санаи фархунда табрик намуда, аз хизматҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бобати пешрафту нумуи кишвари тоҷикон суханронӣ намуд.

Дар ҷараёни чорабинӣ роҳбари дастгоҳи Иттифоқи ҷавонони Тоҷикистон Фаридун Ҳусензода дар бораи нақши Пешвои миллат, муҳтарам Эмомалӣ Раҳмон дар эҳёи давлатдории миллии тоҷикон ёдовар шуда, доир ба хизматҳои Сарвари кишвар дар хомӯш сохтани оташи ҷанги таҳмилӣ, раҳо сохтани мамлакат аз вартаи нестию нобудӣ, барқарорсозии сулҳу суботи сартосарӣ ва давлати сохти конститутсионӣ, ба даст овардани ваҳдати миллӣ ва бунёди давлатдории миллӣ ҳарф зад.

Тамошои филми “ПЕШВО” ба ҳозирин таассуроти амиқ бахшида, дар қалби эшон ифтихор аз Сарвари давлат, ки баҳри пешрафти меҳан тамоми дониш ва маҳорати роҳбарии худро ба кор бурдааст, ба вуҷуд овард.

“ҶТ”