Мӯйсафеди 83-солаи зиндадилу заҳматпешаи сокини деҳаи Дерзуди Ҷамоати деҳоти Назаршо Додхудоеви ноҳияи Рӯшон деҳқон Ҷамшед Мавлододовро чун ҳамеша саргарми кору фаъолият дар заминҳояш дарёфтем. Бо ӯ суҳбате хубе дош-тем оид ба рушди бомароми соҳаи кишоварзиву дигар соҳаҳои мамлакат, инчунин нақши Пешвои миллат муҳтарам Эмомалӣ Раҳмон дар рушди соҳаҳои гуногуни хоҷагии халқи ВМКБ.



- Ба соҳаи кишоварзӣ аз кадом давраҳо рӯ овардед?

- Шурӯъ аз соли 1982 то инҷониб ба кишоварзӣ шуғл дорам. Аввал фаъ-олияти деҳқонии банда аз ноҳияи Шаҳритус оғоз гардида, он вақт дар ихтиёри хоҷагии деҳқонии мо анқариб 40 га замин буд. Вале маҳз ҷанги шаҳрвандии хонумонсӯзи солҳои 90 - ум сабабгор шуд, ки бехонаву дар мондем. Оқибатҳои фалокатбори он ҳама ҷо ба назар расид. Танҳо бо дастгирии чанд тан аз фарзандони содиқ, махсусан аз худгузаштанҳои Пешвои миллат зинда мондему соли 1995 ба зодгоҳам ноҳияи Рӯшон баргаштам.

Агар Роҳбари давлат намебуданд, чӣ ҳолу аҳвол медоштем? Шояд ин лаҳзаву ин соат бо шумо суҳбат ҳам намекардем. Бояд такрор ба такрор ёдовар шуд, ки алангаи ин ҷанг танҳо бо талошу ғайратҳои шабонарӯзии Пешвои муаззами миллат хомӯш карда шуд. Вагарна ормони давлатдорию миллати комил доштан, боз садсолаҳо ё дуртар мерафт. Кунун ватани ободу зебо ва халқи заҳматписанд дорем. Ҳамаи моро лозим аст, ки атрофи Президенти кишварамон аз ҳарвақта бештар муттаҳид бошему дар рушду нумӯи ин меҳан саҳмгузор.

- Солҳои охир дар ноҳияи Рӯшон низ заминҳои бекорхобида ба кор андохта шуданд, гармхонаҳои нав ифтитоҳ ёфтанд. Шумо дар ин ҷода ба кадом пешравиҳо расидед?

- Ба туфайли соҳибистиқлолӣ ва фазои суботи комил ба пешравиҳои рӯзафзун ноил гаштам. Маҳсулоти рӯёндаамон дар бозорҳои вилояту ноҳия ва берун аз он дар ярмаркаҳои фурӯши маҳсулот харидорони зиёд дорад. Ҳосили пурсамар ва дилхоҳу фаровон дорам, ки тадриҷан аз заминҳои полезӣ ҷамъоварӣ карда мешавад.

- Давоми солҳои охир чӣ қадар боғу замин бунёд кардед?

- Қаблан ин заминҳо ҷангалу регзор буданд, касе эътимод надошт, ки рӯзе онҳоро ободу пурбор хоҳем кард. Танҳо солҳои 2009 - 2010 заминҳо пурра аз худ карда шуданд, аммо ягон техника барои шудгоркунӣ ва на ҳеҷ гуна маводи сӯзишворӣ баҳри таъмини он надоштем. Маблағе ҳам набуд, то барои корҳои аввали кишоварзӣ замина гузорем. Аммо ноумед нашудем, эътимоди комил дош-тем, ки рӯзе аз файзи соҳибистиқлолӣ ва ваҳдати комили миллӣ бахти банда ҳам механдад.

Ҳамин тавр, дар навбати аввал ариза барои азхудкунии заминҳо ба Ҳукумати кишвар пешниҳод намудам ва дар асоси он бароям беш аз 11 гектар замин доданд. Солҳои 2010 - 2011 бо дастгириву ғамхориҳои бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ин заминҳоро ба гардиши кишоварзӣ даровардем. Дар ин заминҳо беш аз ду гектар себ, як гектар гелосу шафтолу ва олу шинондам. Дар баробари меваҳои дигар сабзавоти картошка, помидор, пиёзу сабзӣ, ҳатто дар шароити баландкӯҳи вилоят зиёдтар як гектар тарбузу харбуза ҳам шинондем, ки ҳамааш
 нашъунамои хуб дошта, заминҳои азхудгардида ҳосили фаровон медиҳанд. Масалан, себи имсола чунон зиёд шудааст, ки ҳоло ҳам намедонем, ба куҷо барем.

- Асрори муваффақият дар ин самт чист?

- Шояд посухи ин суол барои ҳама ғайриодӣ менамояд, вале ин ҳақиқат аст, ки баъди азхудкунии заминҳо Пешвои миллат бароям як адад трактори нави шудгоркунанда бо ҳамаи таҷҳизоти лозима ҳадя карданд ва бахти ман аз ҳамон рӯз хандида, рафта - рафта сол аз сол ҳосилам фаровонтару пурбаракаттар шуд.
Нуҳ фарзандро ба камол расонидааму ҳамаашон аз пайи кору фаъолият ва зиндагии худу оилаҳояшон ҳастанд. Пӯшида ҳам нест, ки агар ҳамин кӯмаку дастгириҳои Роҳбари давлат намешуд, заминҳоро аз худ карда наметавонис-тем. Ҳамин як нақлиёти кишоварзӣ чандин қувваи кориро иваз мекунад ва ҳоло натиҷаи кору фаъолияташ ба ҳамагон маълум аст.

Мардумнавозӣ ва кӯмаку дастгириҳои пайвастаи Пешвои миллат на фақат барои банда, балки баҳри ҳар як тоҷику тоҷикистонии асил бесобиқа аст. Ин марди қаҳрамон ва нексиришт ба мо сафои зиндагӣ, пешравиҳои ҳамарӯза ва давлати накӯиву оромии саросар овард, ки аз ин неъмати бештар ҳам нест. Як бор назаре андозем ба дигар давлатҳои олам, нафт доранд, пул доранд, қудрат доранд, аслиҳа доранд, вале чунин Роҳбари ғамхору раҳнаморо надоранд, то манфиати милливу халқро болотар аз ҳама гузошта, танҳо баҳри осоиштагӣ ва сулҳу рифоҳи инсоният иқдом кунанд. Шукр, ки дар миёни ин ҳама оташу бенизомиҳои олам танҳо мо чунин кишвару Роҳбари маҳбуби қалбҳо дорем.

- Шумо бо Пешвои миллат вохӯрдед. Зимни он Президенти кишвар бароятон чӣ гуфтанд?

- Чанд сол пеш зимни як сафари кории Президенти Ҷумҳурии Тоҷикистон муҳтарам Эмомалӣ Раҳмон ба ВМКБ дар ноҳияи Рӯшон, аниқтараш, ҳини ифтитоҳи гармхонаҳои замонавӣ дар Рӯшон ва баъдан дар намоиши молу маҳсулот дар назди фурӯдгоҳи шаҳри Хоруғ бо Пешвои миллат вохӯрдем. Роҳбари давлат аз дур маро шинохтанд ва бо лабханд нидо карда, гуфтанд, ки "ҷӯраи ман чӣ ҳолу аҳвол дорӣ?" Гуфтам, то давлату Ҳукуматамон побарҷост, аз ин волотару хубтар худамро ҳеҷ гоҳ эҳсос намекунам ва дидори Шумо худ як шуълаест, ки ҳар даму сол дар қалбамон фурӯзон аст. Хизматҳое, ки Шумо барои ин давлату миллат кардеду менамоед, дар қалби таърих абадан мемонанд.

Воқеиятро наметавон инкор ё дигар кард. Хизматҳои ин фарзонафарзанд на танҳо дар таҳкими истиқлолу субот ё самти маорифу тандурустӣ, кишоварзӣ, балки тамоми соҳаҳои мавҷудаи мамлакат бемисл аст.

- Дар синни мубораки 83 – солагӣ чӣ нияту нақшаҳо доред?

- Он орзуву ормони бунёдии аҷдодие, ки доштем, ҳамааш амалӣ шуд, яъне бо маънои томаш соҳибдавлат ҳастем. Фақат барои сиҳатмандии Роҳбари давлат ва солимиву иттиҳоди халқи тоҷик дуо мекунам. Пешвои миллат доимо тансиҳат ва дар олам соябони сари халқи хеш бошанд. Зеро халқу миллате, ки ҳувияту соҳиб надоранд, аз бадбахттаринанд.

Мо зери роҳбарии Президенти кишвар ба дараҷаи боз ҳам баланди инкишофу пешравии ватанамон хоҳем расид.