Дар нимсолаи аввали соли ҷорӣ бо мақсади таъмини риояи ҳуқуқи истеъмолкунандагон ва ҳимояи бозори истеъмолӣ дар фаъолияти 3553 субъекти хоҷагидор санҷиш ва назорати қоидаҳои савдо гузаронида шадааст.

Дар ин бора директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (Тоҷикстандарт) Давлатзода Қудрат Қамбар 20 июл зимни нишасти матбуотӣ иттилоъ дод.

Номбурда дар идома илова кард, ки дар натиҷаи гузаронидани назорати давлатӣ дар нимсолаи аввали соли 2020 дар 2081 ҳолат ба миқдори 999 ҳазору 677 кг маҳсулоти ғизоии гуногуни пастсифат ба қайд гирифта шудааст, ки 473 ҳазору 483 кг он аз ҷиҳати бехатарӣ ва 526 ҳазору 194 кг он аз рўи тамғагузорӣ дар борҷомаашон ба талабот ҷавобгў набуданд.
  
- Дар озмоишгоҳҳои ташхисии маҳсулоти ғизоии Агентии Тоҷикстандарт аз рўи сифату бехатарӣ ва тамғагузорӣ 418 ҳазору 071 кг маҳсулоти гўштӣ, 157 ҳазору 083 кг равғани растанӣ, 7823 литр нўшокии спиртӣ, 2345 литр нўшокии ташнашикан, 42 ҳазору 533 кг маҳсулоти қаннодӣ, 7715 кг маҳсулоти ширӣ, 61 ҳазору 036 кг чой, какао, қаҳва, 7352 кг иловагии ғизоӣ, 489 ҳазору 99 кг намак, 25 ҳазорру 902 кг консерва ва дигар маҳсулот, ки қисми зиёдашон маҳсулоти воридотӣ мебошанд, ғайристандартӣ дониста шуда, нисбати воридкунандагони ин маҳсулот чораҳои маъмурӣ андешида шуданд, - гуфт Қ. Давлатзода.

Қайд гардид, ки дар ин давра ба Агентии “Тоҷикстандарт” аз тарафи ҶДММ “Tajero”, ҶДММ “Рушон”, ҶДММ “Мурғи Муъминобод” ва ҶДММ “Сардор 2008” ариза оид ба ҳимояи тамғаи молии онҳо ворид гардида, нисбати соҳибкороне, ки ба қонуншиканӣ дар соҳаи моликияти зеҳнӣ роҳ додаанд, нисбаташон парвандаи ҳуқуқвайронкунии маъмурӣ оғоз гардидааст.

Садбарг СУЯРОВА, “ҶТ”