Баъд аз 45 рӯзи маҳдудият бозорҳои кишвар аз ҷумла бозори “Корвон” ба фаъолият шуруъ намуд. “Корвон” яке аз бозорҳои бузурги кишвар аст, ки ҳамарӯза ҳазорҳо нафар сокинони кишвар барои харидани молҳои зарурии рӯзгор, вориди он мешаванд.

Пас аз дубора ба фаъолият шуруъ кардани бозори мазкур, одамони зиёде баҳри харидорӣ меоянд ва нуктаи муҳим ин аст, ки дар ин давраи ҳассос, ҳар нафари вориди ин бозор мегардида, бояд қоидаҳои беҳдоштиро риоя намояду фосилаи муайянро ҳангоми гаштугузор дар бозор ба инобат гирад. Зеро дар ҳолати эътибор надодан, шумораи сироятёфтагон ба коронавирус зиёд мегардад. Баъзеҳо ба ин назаранд, ки қоидаҳои асосии ҷиҳати гирифтор нашудан ба вируси нав дар бештари вақт аз ҷониби харидорон риоя намегардад.

Бино ба таъкиди Ҳалима Мавлонова, директори бозори “Корвон” пеш аз кушодашавии бозор дар якҷоягӣ бо кормандони ин муассиса дар доираи иҷрои саривақтии дастуру супоришҳои роҳбарияти Мақомоти иҷроияи ҳокимияти давлатии шаҳри Душанбе оид ба тозагию ободонӣ, пешгирӣ аз пайдоиш ва густариши бемориҳои сироятӣ суҳбатҳо гузаронидаанд.

Номбурда қайд намуд, ки ҳамарӯза ҳангоми ворид гардидани харидорон ва кормандони бозор аз ҷониби нафарони махсус ҳарорати онҳо санҷида мешавад ва бе ниқоб ба бозор даромаданро иҷозат намедиҳанд.

“Тоҷирони бозор ҳамарӯза бо ниқоб ва дастпӯшак ба мардум хизматрасонӣ мекунанд. Мардум бояд пеш аз ҳама табиби худ бошанд. Дар рӯзҳои истироҳатӣ дар бозор одам бисёр аст ва агар баъзеашон бо ҳарорати баланд бошанд, иҷозат дода намешаванд, ки ба бозор дароянд. Ҳамаи чораҳо барои пешгирии коронавирус дар бозор андешида шудааст”, - илова намуд Ҳалима Мавлонова.

Аз мушоҳидаҳо бармеояд, ки худи сокинони кишвар нисбати саломатии худ беэҳтиётӣ мекунанд. Хеле хуб мешавад, ки ҳамарӯза ба бозор шумораи камтари муштариён иҷозат дода шавад. Ин ҳам барои савдогарон ва ҳам барои харидорон муфид мешавад. Зеро ин тадбирҳо метавонанд, боиси коҳиши бемории сироятии коронавирус гардад. Чӣ дар бозор ва чӣ дар дигар ҷойҳои серодам бояд аҳолӣ муҳофизи солимии худ бошанд.

Парвиз тоҷирест, ки қариб 5 сол мешавад, дар бозори “Корвон” ба савдо машғул мебошад ва соҳиби ду фарзанд аст. Тайи 45 рӯзе, ки ӯ бинобар сабаби коронавирус кор намекард, аз бекорӣ ба мушкилиҳои зиёд дучор шудааст.

“Ман ягона шахс дар хона ҳастам, ки зиндагиро таъмин мекунам. Ҳангоми баста шудани бозор рӯзҳои сахтро натанҳо ман, балки тамоми тоҷирони бозори “Корвон” доштанд. Ман намехоҳам, ки дигар бозорро бубунданд. Чунки мо зиндагиро аз ҳисоби савдои ҳаррӯзаамон мегузаронем. Барои он ки бемории коронавирус аз байн раваду дигар касе ба он сироят наёбад, бояд ҳамаи сокинон масъулият эҳсос намоянду гигиенаи шахсиро риоя созанд. Ҳар нафаре, ки вориди бозор мешавад, бояд ҳамаи қоидаҳоро риоя намояд”- иброз намуд, Парвиз.

Маҳмадсаид Шеров, табиб мегӯяд, “сокинон бояд дар ин давраи ҳассос дар ҷойҳои серодам беҳуда нагарданд. Хусусан дар бозори “Корвон”, ки имрӯз кушода шудааст ва мардум дар он ҷо ба хариду фурӯш машғуланд. Ҳоло дар кишвар бемории сироятии COVID-19 коҳиш ёфта истодааст. Барои он ки бемории мазкур боз ҳам коҳиш ёбад, бояд тамоми қоидаҳои тиббиро дар ҷойҳои ҷамъиятӣ риоя кунем ва беҳуда ба бозор наравем”.

Аз мушоҳидаҳо бармеояд, ки баъзе сокинони кишвар нисбати ин беморӣ бепарвоӣ карда, дар кӯча ва ҷойҳои серодам бе ниқоб мегарданд. Гӯё беморӣ тамоман нест шуда бошад. Аммо ин гуна нест. Ҳар як бепарвоии онҳо метавонад, боиси авҷи бемории коронавирус гардид. Агар мо хоҳем, ки дар муддати кӯтоҳ ин беморӣ аз байн равад, пас гуфтаҳои табибонро ҳатман иҷро намоем.

Хулоса, агар ки ба бозор рафтанием, бояд ҳатман бо ниқоб бошему фосилаи муайянро риоя созем ва дар доираи тавсияҳои табибон ҳаёт ба сар барем. Ин бузургтарин саҳми мо дар пешгириву коҳиш додани бемории сироятии коронавирус аст. Дар ин росто ҳар яки мо бояд масъулият эҳсос намоем.