ҶОМЕА
Ҷумъа 29 Март 2024 05:34
БАРДОШТ АЗ ҲАМОИШИ ҶУМҲУРИЯВӢ БАХШИДА БА 90-СОЛАГИИ "ҶАВОНОНИ ТОҶИКИСТОН"
Дар толори Маҷмааи табъу нашри «Шарқи озод» ҳамоиши ҷумҳуриявии рӯзноманигорони ҷавон ва собиқадорони он таҳти унвони «Гуфтугӯи ду насл» доир гардид. Дар он, асосан, устодону донишҷӯёни факултетҳои журналистикаи донишгоҳу донишкадаҳои кишвар ва рӯзноманигорони собиқу имрӯзи «Ҷавонони Тоҷикистон», ки таърихи навадсола дорад, ба ҳам омаданд.
Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зикр намуд, ки «Ҷавонони Тоҷикистон» аз ҷумлаи нашрияҳое мебошад, ки бо сабку услуби хоси хеш дар таҳкими дӯстиву рафоқат, якдиливу созандагӣ ва ватандӯстиву худшиносии аҳли ҷомеа нақши бориз гузоштааст.
- Агар ба таърихи рӯзнома назар афканем, маълум мешавад, ки он навад соли бурду бохт ва дастовардҳои муҳими таърихии миллати тоҷикро дар худ таҷассум намудааст. Дарвоқеъ, рисолати ҳар рӯзнома аз он иборат аст, ки дар раванди фаъолияти худ, пеш аз ҳама, тарғибгару ташвиқкунандаи дастовардҳои миллӣ, муқаддасоти давлатӣ ва арзишҳои фарҳангию таърихии миллати хеш бошад. Мояи хушнудист, ки ин рисолатро рӯзномаи «Ҷавонони Тоҷикистон» дар фаъолияти худ сарбаландона иҷро намудаву имрӯз низ ба ҷо меорад», - афзуд А. Раҳмонзода.
Ато Ҳамдам, сармуҳаррири ҷарида дар солҳои 1977-1988 тазаккур дод, ки хомабадастони «Ҷавонони Тоҷикистон» барои тозагии забони тоҷикӣ, мақоми давлатӣ гирифтани он, ҳамчунин, баҳри ислоҳи камбудиҳои соҳаҳои гуногун ва ахлоқи ҷомеа талошҳои хастанопазир кардаанд.
Сармуҳаррири имрӯзаи нашрия Шодихони Назар аз мактаби эҷодкорони ҷавон будани ҳафтанома сухан кард. «Воқеан ҳам, ин ҷарида пайванди тиллоии дирӯз бо имрӯз аст. Таърихномаест, ки бурду бохт ва пирӯзиҳои миллати тоҷикро дар саҳифаҳои худ мунъакис кардааст», - гуфт ӯ.
Ёдовар мешавем, ки рӯзномаи «Ҷавонони Тоҷикистон» аввалин маротиба бо номи «Комсомоли Тоҷикистон» 5 апрели соли 1930 бо теъдоди 500 нусха ба нашр расида, 8 ходими эҷодӣ дошт. Рӯзнома тӯли фаъолияти худ 3 маротиба тағйири ном карда, солҳои ҳаштодуми асри гузашта теъдоди нашри он ба 200 ҳазор нусха расида буд.
Дар ҳамоиш, ҳамчунин, китоби тозанашри «Пири дилҷавон» ва нашри махсуси ҳафтанома, ки аз таърихи навадсолаи ҷарида ҳикоят мекунад, рӯнамоӣ гардид.
Эзоҳи худро нависед