Дар ҷамоати деҳоти Қурбоншоҳ Гадолиеви ноҳияи Роштқалъа ба ифтихори ҷашни Наврӯзи байналмилалӣ чорабинии идона баргузор гардид.

Дар чорабинӣ вазири энергетика ва захираҳои оби Ҷумҳурии Тоҷикистон Далер Ҷумъа, раиси ноҳия Лоиқ Назаршозода ва кормандони сохторҳои маҳаллию бошандагони ноҳия иштирок намуданд.

Меҳмонон ҷамъомадагонро ба муносибати иди ҷаҳонии Наврӯз табрику таҳният карда, дар кору ҳаррӯзаи сокинон барору комёбиҳои навро таманно намуданд.

Дар арафаи наврӯзии Роштқалъа тӯйи чор хонаводаи нав ва хатнатӯйи кӯдакон доир гардида, аз тарафи мақомоти иҷроияи маҳаллии ҳокимияти давлатии ноҳия ба навхонадорону кӯдакон мукофотпулӣ дода шуда, барномаи рангини фарҳангӣ аз тарафи ҳунармандони ноҳия пешкаши ҷамъомадагон гашт.

Инчунин, ба ифтихори ин ид мусобиқаи гӯштини миллӣ байни паҳлавонони аз 60 то 80 кило гузашта, дар он паҳлавонони шаҳри Хоруғ, ноҳияҳои Ванҷу Рӯшон ва Шуғнону Роштқалъа барои дарёфти шоҳҷоиза (мошини сабукрав) бо ҳам қувваозмоӣ карданд. Ғолибон бо туҳфаҳои гуногуни мақомоти иҷроияи ҳокимияти давлатии ноҳия мушарраф шуда, шоҳҷоизаро Асрор Қаладоров (вазни 80 кило), паҳлавони ноҳияи Роштқалъа ба даст овард.